Almatyda polıseılerdiń bastamasymen qaladaǵy jalpy bilim beretin mektepterdiń dırektorlarymen keńeıtilgen jınalys ótti.
Kún tártibindegi basty másele – jasóspirimder arasyndaǵy quqyq buzýshylyqtyń aldyn alý jáne olardyń quqyqtyq saýattylyǵyn arttyrý, dep habarlaıdy aqshamnews.kz.
– Bul jaǵdaıda ata-ananyń, polısıanyń, ustazdardyń, jalpy jurtshylyqtyń birlesken kúsh-jigeriniń arqasynda ǵana zańǵa baǵynatyn, ar-ujdany mol, salaýatty jastardy tárbıeleı alatynymyzdy aıta ketken jón. Árbiriniń róli óte mańyzdy. Sondyqtan balalardyń damý kezeńderiniń birinde bos oryn paıda bolmaýy kerek. Durys tárbıe, durys áńgimelesý, bos ýaqyttaryn durys ótkizý, t.b. mańyzdy. Iývenaldy polısıa qyzmetkerleriniń jalpy mindeti – balalarda bolýy múmkin keleńsizdikterdiń aldyn alý jáne olardy keleńsiz jaǵdaılardan qorǵaý. Kámeletke tolmaǵandardyń minez-qulqy men is-áreketine ata-analar tarapynan tárbıelik yqpal etýdiń jáne baqylaýdyń bolmaýy, olardyń zańsyz áreketterge barýyna sebep bolýy múmkin, - dedi Almaty qalalyq PD JPQB ıývenaldy polısıa bóliminiń bastyǵy Janna Shonjanova.
Almaty qalalyq polısıa departamenti kámeletke tolmaǵandar arasyndaǵy qylmystyń, qadaǵalaýsyz, panasyz qalýdyń aldyn alýǵa baǵyttalǵan birqatar keshendi sharalardy júzege asyrýda. Polıseıler júıeli túrde respýblıkalyq, jalpy qalalyq jáne jergilikti reıdter júrgizedi.