Elde kosmetologıa, sonyń ishinde estetıkalyq hırýrgıa naryǵy jyl sanap damyp barady.
Plasıkalyq otanyń alýan túri bar. Sulý bolamyn dep, qaýipti qadamǵa, ota jasatýǵa baratyndar da az emes.
Jyl basynan beri qazaqstandyqtar tarapynan medısınalyq qyzmet sapasyna qatysty 6 myńnan astam shaǵym túsken. Sonyń 34-i kosmetologıalyq qyzmetke qatysty, dep habarlaıdy akshamnews.kz.
24.kz arnasy taratqan málimetke saı, osydan birneshe kún buryn Almatydat artyq salmaqtan arylamyn dep ota jasatqan 47 jastaǵy áıel kóz jumdy. Aıaqasty ómirden ozǵan marqumnyń sińlisi onyń ómirge qushtar jan bolǵanyn aıtady. Sózinshe, ápkesiniń densaýlyǵynda eshqandaı kinárat bolmaǵan.
Dınara Batyrhanova, marqumnyń sińlisi:
Keshe biz Instagram, jańaǵy jelilerden oqyp jatyrmyz, sportpen aınalyssa, tamaǵyn tyıdyrsa, anaý-mynaý bolar edi ǵoı dep. Biraq ol kisi – sportpen de aınalysqan, belsendi ómir, salaýatty ómir saltyn ustanǵan kisi. Qansha jerden dıeta da ustady. Biraq artyq salmaqtan aıyrylmaǵannan keıin osyndaı jaǵdaıǵa keldi. Artyq salmaq bolǵannan keıin aıaǵy isinip ketken. Ol bir sulýlyq, keremet bir nárse, sulýlyq qýyp, pıar jasaıyn dep júrgen adam emes.
Marqumnyń týystary ota jasaǵan dárigerlerdiń jumystaryna salǵyrt qaraǵanyna senimdi. «Tipti kelisimshartta pasıenttiń ómirine qaýip tónýi múmkin ekeni de eskertilmegen ne kórsetilmegen», – deıdi.
Quralaıǵa ota jasaǵan hırýrg bolǵan jaǵdaıǵa qatysty qandaı da bir pikir bildirýden bas tartty. Alaıda klınıkanyń áleýmettik jelidegi paraqshasynda ol óz atynan jazba jarıalapty. Ol jerde hırýrg tergeý júrip jatqandyqtan, oqıǵaǵa qatysty eshteńe aıta almaıtyndyǵyn málimdegen. Aldyn ala boljam boıynsha ólim sebebi – mıokard ınfarktisi. Alaıda marqumnyń týystary bul boljammen kelispeı, polısıaǵa shaǵym túsirdi.
Saltanat Ázirbek, Almaty qalasy PD resmı ókili:
Atalmysh derek boıynsha qylmystyq is qozǵaldy. Adam óliminiń sebebin anyqtaý maqsatynda sot-medısınalyq saraptama taǵaıyndaldy. Saraptamalyq zertteýler men tergeý áreketteri nátıjesinde qylmystyq is aıasynda prosesýaldyq sheshim qabyldanatyn bolady.
Keıingi kezde kosmetologıalyq qyzmetterdiń sapasyna qatysty elde shaǵym kóbeıgen. Jyl basynan beri quzyrly organdarǵa 34 aryz túsipti.
Raıqul Spandıar, QR DSM Medısınalyq jáne farmasevtıkalyq komıteti basqarmasy basshysynyń mindetin atqarýshy:
Bul jerde jábirlenýshi tarap birden polısıaǵa aryz jazyp otyr. Óz kezeginde polısıa tergeý sharalary nemese sot saraptamasy aıasynda bizdiń mamandardy sol mekemeni tekserýge tarta alady. Bizdiń bazada tirkelýi úshin jábirlenýshiler komıtetke nemese aýmaqtyq departamentke shaǵym túsirýi kerek. Sodan keıin 20 jumys kúni ishinde tekserý jumystaryn júrgize alamyz.
Medısınalyq, kosmetologıalyq qyzmet kórsetetin mekemelerdiń arnaıy lısenzıa alatyny belgili. Degenmen mamandardyń aıtýynsha, eshbir qujat adam densaýlyǵyna tolyq kepildik bere almaıdy. «Sondyqtan memlekettik organdar tarapynan baqylaýdy kúsheıtý kerek», – deıdi olar.
Arman Isenov, zańger: - Kóbinese klıentter men olardyń quqyǵyn qorǵaıtyn zańgerler sapasyz qyzmet kórsetken uıymǵa tekserý júrgizýge shaǵym túsirgende tıisti is-sharalardyń birden qolǵa alynbaıtynyn aıtyp jatady. Osy oraıda jekemenshik uıymdardy tekserý tártibin ózgertý kerek dep oılaımyn. Múmkin josparly tekseris jumystaryn da jıi ótkizý kerek bolar.
Quralaıdyń artynda jan jary, 3 balasy qaldy. Týystary sot-medısınalyq saraptama qorytyndysyn kútip otyr.