Patrúldik polısıa qyzmetkerleri Almaty polısıasynyń biriktirilgen kúshteriniń biryńǵaı sap túzeýi barysynda gramotalar men alǵys hattarǵa ıe boldy.
Patrúldik polısıa polkiniń jasaqtary, mamandandyrylǵan batalón, JQAJ qyzmetkerleri komandırlerdiń nusqaýlaryn tyńdady, dep habarlaıdy Almaty-akshamy.kz Polisia.kz-ke silteme jasap.
«Tártip pen azamattardyń amandyǵy polısıanyń qalaı jumys isteıtinine baılanysty. Polısıa qyzmetkerleriniń azamattarmen tyǵyz baılanysta bolýy óte mańyzdy: ýchaskelik polısıa qyzmetkerleri óz aımaǵyndaǵy árbir turǵyndy jaqsy bilýi kerek jáne olardy eń kóp mazalaǵan nársege qyzyǵýshylyq tanytýy qajet. Materıaldyq-tehnıkalyq baza men kıim qyzmetkerlerimizge oqıǵalardan qalys qalmaı, qylmysqa qarsy turýǵa múmkindik beredi», – deıdi Almaty qalalyq polısıa departamenti bastyǵynyń orynbasary Oljas Myrzabekov.
Qylmystyń basym bóligin polıseıler “izin sýytpaı” ashady. Biryńǵaı sap túzeý barysynda patrúldik polısıa polkiniń jáne mamandandyrylǵan batalónnyń 9 qyzmetkeri qylmyspen kúreste kásibı sheberlikteri úshin marapattaldy.
«Búgin men, eń aldymen, qyzmette erekshe kózge túsken qyzmetkerlerdi kótermeledim. Olar jas tártip saqshylaryna tálimger jáne ózderiniń baı kásibı tájirıbesimen bólisedi. Sonymen qatar jeke quramnyń sybaılas jemqorlyqtyń kez kelgen kórinisterine qatysty ymyrasyz ustanymyn eske salý óte mańyzdy boldy. Biz olardan azamattardyń qaýipsizdigi men ıgiligi úshin adal jáne rıasyz eńbek etýdi talap etemiz. Memleket minsiz jumys isteýge barlyq jaǵdaıdy jasap otyr», – dedi Myrzabekov.