Eki er adam qalanyń ártúrli aýdandarynda bóten páterlerge kirip, baǵaly zattardy urlap júrgen.
Qazirgi ýaqytta “qylmystyq juptyń” úlesinde bótenniń múlkin urlaý boıynsha úsh epızod bar, dep habarlaıdy Almaty-akshamy.kz Polisia.kz-ke silteme jasap.
«Qaskóıler standartty tizbek boıynsha áreket etti. Terezelerdi ashý arqyly páterler men úılerge kirgen. Jeke sektordaǵy úılerdiń birinde kóliktiń esigin ashyp, ishindegi aqshany urlap ketken. Qazirgi ýaqytta Áýezov, Medeý jáne Bostandyq aýdandarynda jasalǵan úsh urlyq deregi dáleldendi. Sondaı-aq ustalǵandardyń biriniń kóligin tintý kezinde odan 9 mm kalıbrli Makarov júıesiniń jaýyngerlik tapanshasy, 23 dana oq-dári tabyldy», – dedi Almaty qalalyq polısıa departamenti bastyǵynyń orynbasary Dıdar Ahanov.
Dıdar Ahanovtyń aıtýynsha, kúdiktilerdi ustaý is-sharasyn krımınaldyq polısıa, Áýezov aýdandyq PB-ǵa qarasty polısıa bóliminiń qyzmetkerleri jáne polısıanyń arnaıy jasaǵy júrgizgen.
«Urylardyń sońǵy qylmysy nátıjesinde almatylyq azamattyń páterinen altyn buıymdary men aqshasy joǵalyp ketken. Ustalǵan adamdar zattaı aıǵaqtardan qutylyp úlgermedi. Zattar tutqyndaý kezinde tárkilendi jáne qylmystyq iske qosyldy. Qazirgi ýaqytta qylmysqa qatysýshylar ýaqytsha ustaý ızolátoryna qamaldy. QR QK-niń 188-baby 3-bóligi boıynsha sotqa deıingi tergeý amaldary júrgizilýde. Aıtpaqshy, kúdiktiniń biri – 1983 jyly týǵan M.esimdi azamat. Buryn da osyǵan uqsas qylmystar jasaǵany úshin sottalǵan, al onyń sybaılasy – 1991 jyly týǵan Ia.esimdi azamat. Ol adam óltirgeni úshin jazasyn ótep kelgen», – dedi Dıdar Ahanov.