Almaty qalasyndaǵy «Qazaqstan» qonaqúıiniń artynda ornalasqan «Dostyq» saıabaǵynda «Aq jol» demokratıalyq partıasynyń qalalyq fılıaly men jastar qanatynyń ókilderi Májilis depýtaty, partıa tóraǵasy Azat Perýashevtiń bastaýymen «Taza Qazaqstan» aksıasy aıasynda uıymdastyrylǵan jalpyqalalyq senbilikke belsene qatysty.
Ekologıalyq mádenıetti qalyptastyrý men qorshaǵan ortany kórkeıtýge baǵyttalǵan aksıa barysynda partıa músheleri men eriktiler tabıǵatty aıalaýǵa, turaqty damý ıdeıalaryn ilgeriletýge, qoǵamnyń belsendiligine nazar aýdarýǵa tyrysty. Jańbyr men naızaǵaıdan keıin saıabaq aýmaǵynda kóptep qulaǵan butaqtar men japyraqtardy jınap, balalar alańyn, jaıaý júrginshi joldaryn tazalap, abattandyrý jumystaryna kiristi. Partıa ókilderi bul mindetti qysqa ýaqyt ishinde tıanaqty oryndap shyqty.
Memlekettik demalysta júrip, elimizdiń túrli óńirlerindegi óndiris oryndaryn aralap júrgen Azat Perýashev Almatyǵa arnaıy at basyn buryp, senbilikke partıalastarymen birge qatysty:
– Bul jerde másele partıada da, sharada da emes. Tazalyq – ózimizden bastalatyn uǵym. Qaıda turatynymyz mańyzdy emes: aýyl bolsyn, qala bolsyn, úıimizdiń de, elimizdiń de kórki – óz qolymyzda. Úıińdi senen basqa eshkim kelip jınap bermeıdi. Jaqsy ómir súrgimiz kelse, ózimizden bastaýymyz kerek. Bul – ómirlik ustanym bolýy tıis. Ar-uıatpen, ata-babamyzdan jetken dástúrmen ómir súrsek, qoǵam da kórkeıedi, – dedi ol.
Almaty qalalyq fılıal tóraǵasynyń orynbasary Arman Jumadil osyndaı bastamalardyń qoǵam sanasyn jańǵyrtyp, týǵan jerge degen súıispenshilikti oıatatynyn aıtty:
– Tarıhshy retinde aıtarym, bir kezderi mundaı senbilikter májbúrli sıpatta ótetin. Búgingi tańda olar halyqtyń sanaly tańdaýyna, týǵan úıin, týǵan jerin taza ustaýǵa degen ishki nıetine aınalýy qajet. Ata-babalarymyz tabıǵatty aıalaýdy ómirlik murat tutqan. Osyndaı qasıetter árbir qazaqtyń boıyna sińip, ómiriniń bólshegine aınalýy tıis. Qazirgideı mazasyz kezeńde bizdiń barlyq ýaıymymyz tazalyqpen bastalyp, tártippen aıaqtalsyn. Tek sonda ǵana biz týǵan qalamyz ben Otanymyzdyń bolashaǵy týraly erkin oılaı alamyz, – dedi ol.
Senbilikke qatysqan jastardyń arasynda Almatyda oqý-jattyǵý jıynyn ótkizip jatqan erler men áıelder arasyndaǵy Qazaqstan quramasynyń regbıshileri de boldy. Olar jattyǵý ornyna saıabaqty tańdady.
Erler quramasynyń kapıtany Magomedrasýl Magomedov shaqyrtý alǵanyn qýana qabyldaǵanyn jetkizdi:
– Bala kúnimde ár senbi saıyn úıde de, mektepte de, aýlada da osyndaı senbilikter ótetin. Búginde elimizdiń ár óńirinen kelgen jigitter de bizben birge senbilikke shyqty. Olar Almatyda buqaralyq senbilik dástúri bar ekenin kórip, qatty tańǵaldy. Óz qalalarynda mundaı bastamalar sırek kezdesedi eken. Bizden úlgi alý kerek deıdi. Shynynda da, qala tazalyǵy syrt kózge birden baıqalady. Biraq munda ómir súretin – biz. Sondyqtan biz ózimiz úshin, óz jaılylyǵymyz úshin atsalysýymyz qajet, – dedi ol.
Qazaqstan áıelder quramasynyń múshesi Ksenıa Kım de óz oıyn ortaǵa saldy:
– Qala turǵyndarynyń osyndaı senbilikke belsendi qatysýy – óte mańyzdy. Bul – qalaǵa da, almatylyqtardyń ózine de paıdaly. Qoǵam bolyp tártipti saqtaý – árbirimizdiń ortaq mindetimiz. Jerimizdi aıalaýǵa, kútip ustaýǵa shaqyramyn! – dedi sportshy.