Qala turǵyndary men túrli uıym ókilderi bul aksıany qoldady. Aýezov aýdanynda senbilikke ekoaktıvıster men tabıǵatqa beıjaı qaramaıtyn turǵyndar qatysty.
Senbiliktiń maqsaty — qaladaǵy tazalyqty saqtaý jáne halyqty tazalyq mádenıetin qalyptastyrýǵa úndeý. Ekologıalyq kampanıanyń erekshelikteri týraly Aýezov aýdanynyń áleýmettik bóliminiń meńgerýshisi Zakıda Tastembekova aıtyp berdi:
– Biz ekologıalyq aksıalarǵa únemi qatysamyz. Basty maqsat – qalany taza ustaý, kógaldandyrý jáne abattandyrý. Mundaı áreketter jas býyn úshin úlgi dep oılaımyn, – dedi ol.
Megapolıs turǵyndary "Taza Qazaqstan" jalpyekologıalyq aksıasynan shet qalmady.
– Biz bul tazalyq sharasyna burynnan qatysqymyz kelip júrgenbiz. Mine, búgin qatysý sáti tústi. Ózime 65 jas toldy. Soǵan qaramastan, úıde de "plasık", "shyny", "taǵam qaldyqtaryn" jeke-jeke bólip, suryptaýǵa tyrysamyn. Barshańyzdy muqıat bolýǵa shaqyramyn, – dedi qala turǵyny Qaldybaı Ábdiqadyrov.
Jetisý aýdanynda da senbilik ótti. Aksıa tańǵy saǵat 09:00-de Rysqulov dańǵyly men Bókeıhanov kóshesiniń qıylysynda bastaldy.
– Senbiliktiń basty maqsaty – tek tazalyq saqtaý ǵana emes, sonymen qatar ekologıalyq mádenıetti qalyptastyrý. Ókinishke qaraı, keıbireýler "tazalyq – tek komýnaldyq qyzmettiń mindeti" dep túsinedi. Bul túbegeıli qate pikir. Ekologıa – úlken másele, ony bárimiz birigip sheshýimiz kerek, – dedi Jetisý aýdany abattandyrý bóliminiń bas mamany Ernar Batyrov.
Jalpy senbilikke 2500-den astam qala turǵyny qatysty jáne qala aýdandarynda 82 arnaıy tehnıka jumyldyryldy.
Aýezov aýdany (Saın men Abaı kósheleriniń qıylysy): aǵashtardy sanıtarlyq kesý, aram shópterdi joıý, trotýarlar men qoǵamdyq keńistikterdi tazartý, jasyl aımaqtardy abattandyrý.
Almaly aýdany (Nazarbaev-Kabanbaı batyr-Rozybakıev-Karasaı batyr jáne Tóle bı-Týrgýt Ozal-Raıymbek-Rozybakıev kósheleri sheńberi): kóshelerdi sypyrý, balalar jáne sport alańdaryn jóndeý men syrlaý, qoqys jáshikterin syrlaý, jaryq shamdaryn aýystyrý, kógaldardy shabý jáne sýarý, trotýarlar men skverlerdi jýý.
Alataý aýdany ("Darhan" yqshamaýdany): qoqys jınaý, jasyl aımaqtardy kútip-baptaý, túsken japyraqtardy jınaý, joldar men trotýarlardy jýý, áleýmettik nysandardyń aýmaǵyn tazalaý jáne basqa da abattandyrý jumystary.
Jetisý aýdany (Rysqulov dańǵyly men Bókeıhanov kóshesiniń qıylysy): japyraqtar men qoqysty sypyrý, aǵash dińderin túzeý, trotýarlardy sypyrý jáne jýý.
Medeý aýdany ("Merkýr Grad" TK, 27, 28, 29, 30 úıler alańy jáne "Dostyq" skveri): aýla aýmaqtaryn tazartý, balalar jáne sport alańdaryn jóndeý men syrlaý, qoqys jáshikterin syrlaý, jaryq shamdaryn aýystyrý, aǵashtardy sanıtarlyq kesý, trotýarlar men skverlerdi jýý, jaıaý júrginshi aımaqtaryn tazartý.
Bul barlyq orynnan 700 tekshe metrden astam qoqys shyǵaryldy.