Arbadaǵy tenıs álemde keńinen tanymal
Almaty qalasynda paralımpıalyq tenısten birinshi ret Qazaqstan chempıonaty máresine jetip, alǵashqy jeńimpazdar anyqtaldy, dep habarlaıdy Almaty-akshamy.kz QazAqparatqa silteme jasap.
Qazaqstan tenıs federasıasynan málim etkenindeı, el birinshiligine Aqtóbe, Aqtaý, Oral, Qaraǵandy, Astana jáne Almaty qalalarynan 40-tan astam sportshy qatysty.
Chempıonattyń ashylý rásiminde Qazaqstan tenıs federasıasynyń (QTF) atqarýshy dırektory Deıv Maılıge Ulttyq paralımpıalyq komıtetten QTF-ny jazǵy paralımpıalyq sport túri – arbadaǵy tenıs boıynsha sporttyq federasıa dep taný týraly sertıfıkat tapsyryldy.
Jarys tórt jas ereksheligine qaraı ótkizilip, myna sportshylar júldege ilikti.
Erler 16+:
1.Dastan Nıazov (Aqtóbe)
2.Fedor Starygın (Qaraǵandy)
3.Evgenıı Bykov (Qaraǵandy).
Qyzdar 16+:
1.Aıshýaq Jetpeıisova (Qaraǵandy)
2.Aıgúl Berdisheva (Aqtóbe)
3.Ásel Asaýbaeva (Qaraǵandy).
Bozbalalar 14-15 jas:
1.Madıar Baıkenov (Aqtóbe)
2.Turarbek Marat (Oral)
3.Nazar Trofımov (Aqtaý).
Balalar 7-8 jas:
1.Ivan Solovev (Almaty)
2.Holıd Rýstamov (Astana).
Sondaı-aq astanalyq Dinmuhamed Álıakparov «Úzdik tehnıkasy úshin», oraldyq Albına Bekjanova men aqtóbelik Evgenıı Edelev «Jeńiske degen jigeri úshin» atalymymen marapattaldy.
«Arbadaǵy tenıs álemde keńinen tanymal. Ýımbldon, AQSH, Aýstralıa, Fransıa ashyq chempıonattary sekildi «Úlken dýlyǵa» týrnırleri bar. Óz juldyzdary da az emes. Qazaqstandyq sportshylardyń solardyń qataryna qosylatynyna senemin. Eń bastysy, aıanbaı ter tógý kerek. Týrnır qorytyndysy boıynsha ulttyq qurama jasaqtalyp, aldaǵy jyly Qytaıda ótetin halyqaralyq jarysqa alǵash ret qatysatyn bolady», dedi Qazaqstan tenıs federasıasynyń atqarýshy dırektory Deıv Maılı.
Eske sala keteıik, budan buryn Elena Rybakınanyń álemdik reıtıńide 22-orynǵa kóterilgenin, qazaqstandyq tenısshi álemdik reıtıńide jeke rekordtyq nátıjege qol jetkizgenin jazǵan edik.