Ol mýzeıde 20 jylǵa jýyq eńbek etken.
Qańtar oqıǵasynda Ortalyq mýzeı jádigerlerin saqtap qalǵan maman jarty jyldan beri jumyssyz júr, dep habarlaıdy Almaty-akshamy.kz Halyq Uni saıtyna silteme jasap.
Bıbigúl Dandyǵaraevanyń aıtýynsha, ol Almatydaǵy Memlekettik Ortalyq mýzeı dırektorynyń orynbasary qyzmetinen ketýge májbúr bolǵan.
«Osy mýzeıde qarapaıym ǵylymı qyzmetkerden bastap dırektordyń orynbasary bolǵanǵa deıingi aralyqta 20 jylǵa jýyq jumys istedim. Mýzeıge jańa basshy kelgen soń, kemshilikterdiń barlyǵyn maǵan jaýyp, qyzmettesterimniń aldynda eshqandaı abyroıym da qalmady. Shydamaı, shyǵyp kettim. Qazir 5 aıdan beri jumyssyz otyrmyn. Mádenıetti adammyn, onymen ursysyp jatpaımyn ǵoı. Mamandyǵy geolog bolǵan jańa basshy Atyraýdaǵy ólketaný mýzeıinen kelip otyr. Bul – megapolıs, Qazaqstandaǵy eń kóne mýzeı», - dep túsindirdi ol.
Onyń aıtýynsha, mýzeıge jańa basshy kelgen soń, mýzeıdiń burynǵy qyzmetkerleri jumystan ketýge májbúr bolǵan.
«Dırektor kelgen soń, baspasóz qyzmeti de, bas esepshi, eki orynbasar da jumystan ketti. Qańtar oqıǵasynda ózim júgirip jalǵyz shyqqanym ras. Bárimiz qorqyp kettik ol kezde. Qańtar oqıǵasynda qoryqpaı shyǵyp, ómirimdi qıa jazdadym. Mýzeıge jıyrma jyl ómirimdi berdim. Mýzeıde saqtalyp turǵan árbir qundylyq maǵan óte qymbat. Meniń elimniń tarıhy - ózimniń tarıhym. Qymbat qundylyqtardy qolymmen ustap, kózimmen kórgenim úlken estelik bolyp qaldy», - deıdi Bıbigúl Dandyǵaraeva.
Aıtýynsha, osy oqıǵadan soń kúızeliske túsip, óz-ózine kele almaǵan. Tipten júrip-turýǵa qarjysy da qalmaǵanyn aıtady.
«Osy oqıǵadan soń, eki aı stress alyp, depressıaǵa tústim. Basymdy kótergenim endi, minekeı. Qazir qyzdarym qaraıdy. Esimdi jıyp, jumys izdep jatyrmyn. Eshqaıda shyqpaımyn. Júrýge de qarajatym joq. Jasym 54-ke keldi. Maǵan aýyr bolyp tur. Osynshama jyl jumys istep, eńbek tájirıbemdi eskermegeni úshin ókpelimin», - deıdi tájirıbeli maman.
Qańtardyń 5-i kúni Almatyda jaǵdaı shıelenise bastaǵanda, belgisiz bireýler mýzeıdiń ortalyq esigin buzyp kirgen. Sol kezdegi mýzeı qyzmetkeri Bıbigúl Dandyǵaraeva olarmen kelissóz júrgizip, mýzeı eksponattaryn aman alyp qalǵan bolatyn.
«Dalada órt bolyp jatty. Aıdaladan oq atylyp, mýzeıdiń terezeleri syndy. Jan-jaǵyna qarasańyz, osy mańdaǵy ǵımarattardyń bári órtengen, qıraǵan, sol qırandylar arasynda mýzeı ǵana búlinbegen qalypta tur. Búlikshiler nege toqtady? Múmkin men áıel bolǵandyǵym úshin shyǵar, er adam shyǵyp sóılese, jaǵdaı basqasha bolýy múmkin edi. Anany qurmetteıtin halyqpyz, osy jaǵdaı da áser etken shyǵar», - dep eske aldy Bıbigúl Dandyǵaraeva.
Osy jaǵdaıdan soń Prezıdent Qasym-Jomart Toqaev Bıbigúl Dandyǵaraevany «Parasat» ordenimen marapattaǵan bolatyn.
«Onyń erligi men otansúıgishtigi arqasynda qańtardaǵy tártipsizdikter kezindegi mýzeıdiń qundy eksponattary saqtalyp qaldy. Bul – naǵyz erlik», - degen bolatyn Memleket basshysy.