17 naýryz kúni Abaı atyndaǵy Qazaq ulttyq opera jáne balet teatrynda bı óneriniń jankúıerleri ystyq yqylaspen qarsy alǵan «Lazgı. Jan men mahabbat bıi» baletiniń qoıylymy ótti. Qoıylymdy «Ózbekstannyń ulttyq baleti» trýppasy usyndy.
Keshtiń qurmetti qonaqtary qatarynda Qazaqstan Respýblıkasy Memlekettik keńesshisi Erlan Qarın, Ózbekstan Respýblıkasy Prezıdentiniń birinshi kómekshisi Saıda Mırzıóeva, Qazaqstan Respýblıkasynyń Mádenıet jáne aqparat mınıstri Aıda Balaeva, Almaty qalasynyń ákimi Erbolat Dosaev boldy.
Tashkentten Almatyǵa deıin
Balettiń tusaýkeseri 2021 jyly Tashkentte ótti. Halyqaralyq premerasy Dýbaı opera sahnasynda qoıylyp, keıin Parıj, London, Máskeý, Beıjiń, Baký jáne Stambýl qalalarynda kórsetildi.
Belgili nemis horeografy jáne baletmeısteri Raýl Raımondo Rebek qoıǵan bul erekshe qoıylym Lazgı bıine arnalǵan. Bul ejelgi halyq bıi IýNESKO-nyń adamzattyń materıaldyq emes mádenı murasynyń bir bóligi retinde moıyndalǵan. Úsh myń jyldyq tarıhy bar bul bı halyqtyń danalyǵy men ulttyq dástúrleriniń rýhyn beıneleıdi. Kúrdeli qımyldardyń, erekshe stıldiń jáne qýatty energetıkanyń úılesýi bul bıdi naǵyz mádenı fenomenge aınaldyrady.
Qoıylym kórermenderdi Uly Jibek joly boıymen Ortalyq Azıany kesip ótken kerýender zamanyndaǵy alys ótken shaqqa jeteleıdi. Shól dalanyń aptap ystyǵynda, shamandyq áýenderdiń sıqyrly yrǵaǵymen Mahabbat dúnıege kelip, Máńgilik Jan óziniń sheksiz bıin bastaıdy. Bul jol – ótkennen búginge deıingi kópǵasyrlyq dástúrler men halyq rýhynyń urpaqtan-urpaqqa jalǵasýyn beıneleıdi.
Kelesi qoıylym – Astanada
Balet Ózbekstannyń Mádenıet jáne ónerdi damytý qorynyń (ACDF) qoldaýymen uıymdastyryldy. Kelesi qoıylym 27 naýryz kúni «Astana Opera» teatrynda ótedi.
Shyǵarmashylyq top:
Ideıa avtory: Saıda Mırzıóeva
Joba jetekshisi: Gaıane Ýmerova
Lıbretto jáne horeografıa: Raýl Raımondo Rebek
Senografıa: Ioko Seıama
Kostúm dızaıneri: Frol Býrımskıı
Mýzykalyq óńdeý jáne kompozısıa: Devıdson Djakonello
Jaryq qoıýshy sýretshi: Tım Vaslavek
Keńesshiler: Gúlnora Mýsaeva jáne Gavhar Matákýbova