Mamandar qala turǵyndaryn temekini qurǵaq shópke tastamaýǵa shaqyrdy.
Almatyda İle Alataýy ulttyq tabıǵı parkinde ot tutatqan 27 jastaǵy er adam ustaldy. Tártip buzýshyǵa 145 myń teńge kóleminde aıyppul salyndy. Qalada órtke qarsy rejım engizilgeni týraly Óńirlik komýnıkasıalar qyzmetinde ótken brıfıńte qalalyq TJD bastyǵynyń orynbasary, azamattyq qorǵaý polkovnıgi Samat Asaınov málimdedi, dep habarlaıdy Almaty-akshamy.kz.
Samat Asaınovtyń aıtýynsha, Almatyda órttiń qaýipti kezeńi naýryz aıynda bastalyp, ádette qazan aıyna deıin sozylady. Osy ýaqytta TJD quramy kúsheıtilgen tártipte qyzmet atqarady. Tabıǵı órttiń aldyn alý boıynsha monıtorıń júrgiziledi.
«Bıyl shilde aıynda aýa raıy qubylmaly boldy. Kún qatty ysydy. Azdap jaýǵan jaýyn-shashynnan aýa temperatýrasy tómendegen joq. Ásirese, bul taýly aımaqqa qatysty. Alaıda ýaqytyly qabyldanǵan sharalardyń arqasynda órttiń aldyn aldyq. Órttiń qaýipti kezeńi bastalǵannan beri 193 aǵash órtendi. Bıyl qurǵaq shóptiń janýy 14,3%- ǵa, qurǵaq ósimdikterdiń janýy 55,2%-ǵa azaıdy», – dedi Almaty TJD bastyǵynyń orynbasary.
Buǵan deıin kóktemde jergilikti atqarýshy organdardyń qatysýymen aýqymdy jumys bastalǵan. Aýdan ákimdikteri jalpy aýdany 153,7 ga qurǵaq shópti tazalaý jumystaryn bastady. Jer jyrtylyp, uzyndyǵy 75,57 km mıneraldy jolaqtar jańartyldy.
Sondaı-aq Samat Asaınov Almaty qalasy TJD men polısıa qyzmetkerlerinen quralǵan mobıldi toptyń jumysyna toqtaldy. Bul qyzmetke orman sharýashylyǵy mekemeleriniń qyzmetkerleri qol ushyn sozyp, eriktiler de qatysty. Bul toptar órt týyndaýy yqtımal degen «ystyq» aımaqtardy tekseredi.
«Mobıldik toptar 82 birlesken reıd júrgizdi. Demalýshylarǵa túsindirme jumystaryn júrgizdi. Ot tutatqan 235 jaǵdaıǵa tosqaýyl bolyp, 200 jeke tulǵany ákimshilik jaýapkershilikke tartty. Onyń ishinde úsh adam Ákimshilik kodekstiń 367-baby boıynsha jaýapkershilikke tartylyp, jalpy somasy 437 550 teńge kóleminde aıyppul salyndy. Qalǵan tártip buzýshylarǵa qatysty eskertý jasaldy», – dedi Samat Asaınov.
TJ departamentiniń ókili jyl saıyn ótkiziletin aldyn alý sharalarynyń arqasynda sońǵy 9 jylda taýly jáne ormandy jerlerde, orman-saıabaq aımaqtarynda órtke jol berilmegenin aıtty.
«Barlyq qutqarýshylar taýlar men ormandarda qaýipsiz júris-turys mádenıetin saqtaǵany úshin qýanatynyn aıtqym keledi. Tabıǵatta ashyq ottyń jaǵylýyna jol bermeý óte mańyzdy. Qurǵaq shóp pen qoqysty órtemeńiz. Qurǵaq shópti ádeıi órteıtin adamdar jaqyn aımaqty tazartý úshin qaýip tóndiredi. Mysaly, jeke aýlanyń ıeleri men baǵbandar ystyq kúnnen keýip qalǵan shóp pen qoqysty órtep jiberedi», – dedi Samat Asaınov.
Polkovnık qala turǵyndaryna ot jaǵý faktileri qatań túrde toqtatylatynyn eskertti. Óıtkeni qurǵaqshylyq pen ystyq aýa raıynda shóp tez tutanady, bul órtke ulasýy múmkin. Sondaı-aq, ol ońtústik astananyń turǵyndary men qonaqtarynan temekini qurǵaq shópke tastamaýdy, bótelke, synǵan shyny qaldyrmaýdy surady.
Órt qaýipsizdigi erejelerin buzǵany úshin kináli adamdar buzýshylyqtyń sıpaty men keltirilgen zalalǵa baılanysty ákimshilik jáne qylmystyq jaýapkershilikke tartylýy múmkin ekenin este ustaǵan jón.
Almaty qalasy TJD bastyǵynyń orynbasary Almaty turǵyndaryna «Qazgıdromettiń» aldyn ala málimetteri boıynsha, shilde aıynyń ekinshi jartysynda jáne tamyz aıynda megapolıs aýmaǵynda azdaǵan jaýyn-shashyn, sondaı-aq aýa temperatýrasynyń keı jerlerde 40 gradýsqa deıin kóterilýi kútiletinin aıtty.
Osy ýaqytta Almaty qalasy ákimdiginiń, «Qazáýequtqarý» jáne «Qazáýeormanqorǵaý» RMQK barlyq qutqarý qyzmetteri jaýyngerlik ázirlikte bolady.