Máıitten zorlyq belgileri tabylǵan
Ostroýmova kóshesindegi úılerdiń birinde órt shyqty. Órt týraly habarlama “101” púltine keshki saǵat 21:00 shamasynda kelip túsken, dep habarlaıdy Almaty-akshamy.kz Polisia.kz-ke silteme jasap.
«Órtti lokalızasıalaǵannan keıin bólmelerdiń birinen zorlyq-zombylyq belgileri bar er adamnyń máıiti tabyldy. Keıin bul – úıdiń ıesi, 38 jastaǵy K.esimdi azamat ekendigi anyqtaldy. Buryn júk kóliginiń júrgizýshisi bolyp jumys istegen. Biraq densaýlyǵyna baılanysty birneshe aıdan beri esh jerde jumys jasamaǵan. Sot-medısınalyq saraptamasynyń qorytyndysyna sáıkes, adamnyń ólimine – moıynnyń kesilgen jaraqaty, sol jaqtaǵy keýde tusyndaǵy pyshaq jaraqaty, ishtiń jáne sol jaq buǵana aımaǵyndaǵy enip ketken pyshaq jaraqattary jáne odan keıingi máıitti órteý sebep bolǵan. Tergeý barysynda 44 jastaǵy P.esimdi azamat anyqtaldy, ol qylmys jasalmas buryn jábirlenýshiniń úıine qonaqqa kelgen», – dedi Túrksib aýdandyq PB janyndaǵy polısıa bóliminiń bastyǵy Meıirhan Jańabaev.
Er adamdardyń alkogóldik ishimdik ishkeni anyqtaldy. Olardyń arasynda janjal týyndap, onyń barysynda P.esimdi azamat úı ıesine birneshe ret pyshaq jaraqatyn salǵan.
«Qylmystyń izin jasyrý úshin kúdikti úıge órt qoıǵan. Atalǵan derek boıynsha QR QK-niń 99-baby 1-bóligine sáıkes qylmystyq is qozǵaldy. Jaýap alý kezinde ustalǵan adam as úı pyshaǵyn birinshi bolyp úı ıesiniń ustaǵanyn, ol onyń qolynan julyp alyp, oǵan birneshe ret ólimshi soqqylar jasaǵanyn aıtty. Kisi óltirýdiń naqty mán-jaıy tergeý barysynda anyqtalatyn bolady», – dedi M.Jańabaev.