Jetisý aýdanyndaǵy №2 jalpy bilim beretin mektep oqýshylary ár aptanyń dúısenbi, sársenbi jáne jumasynda ulttyq kıim kıýdi dástúrge aınaldyrǵan.
Byltyr aptanyń eki kúninde ǵana kıetin. Bıyldan bastap oqýshylar sabaqta úsh kún ulttyq kıimmen, al eki kún mektep formasymen otyrady. Kórgen adamnyń kózi toıatyn ulttyq naqyshtaǵy kıimderdi kıý bastamasyn mektep dırektory Sáýle Altybaeva byltyr elimizde Ulttyq kıim kúni 18 naýryz dep jarıalanǵan kúnnen bastap kótergen eken. Muǵalimder de solaı, aptanyń úsh kúninde qazaqy oıý-órnekpen kómkerilgen, zamanaýı úlgide tigilgen qamzol, kájekeılerin kıip sabaq beredi. Taqta aldynda turǵan ustaz men ár synyptaǵy otyzshaqty bala osylaı ulttyq kıimmen úndestik quryp turatyny qandaı ǵajap!
Ulttyq naqyshtaǵy kıimderdi kópke dáriptep júrgen №2 jalpy bilim beretin mektepte 468 bala bar, olardyń 152-si bastaýysh synyptardyń oqýshysy.
– Byltyr mektep dırektory Sáýle Meldeshqyzy osy ulttyq formany retteý úshin synyptar arasynda «Úzdik synyp» baıqaýyn jarıalap, forma saqtaǵan, sabaqtan qalmaǵan synypqa óz qaltasynan aqshalaı syı bergeni bar. Sodan beri ulttyq kıim kıip kelý bir izge tústi. «Tárbıe men bilim – egiz» demekshi, árıne, bizge ata-analar úlken qoldaý kórsetti. Kıimderdi tiktirý, oıýly kıimderdi tańdaý kezinde ata-analardyń da talǵamyn eskerdik. Biz Otanyn súıetin, ultyn, onyń salt-dástúrin qadirleıtin, ádepti, tárbıeli shákirt tárbıelep jatqanymyzdy maqtan etemiz, – deıdi qazaq tili men ádebıeti pániniń muǵalimi Janat Úmbetova.
Shákirt lebizi
Dınara Aıbek, 5-synyp oqýshysy:
– Maǵan ulttyq kıim kıip júrgen unaıdy. Synypta bárimiz birdeı kıinemiz. Qolaıly. Bizdi ózgelerden erekshelendirip turatyn da osy ózimizdiń ulttyq kıimimiz.
Aslan Abdýlla, 7-synyp oqýshysy:
– Naýryz meıramyn toılatýǵa Keńes ókimeti tyıym salynǵanyn estip qatty tańqalǵanym bar. Naýryz – úlken-kishini bir-birine jaqyndastyratyn, bir-birine jaqsy tilegin jetkizýge dáneker bola alatyn ulyq mereke dep bilemin. Bul kúni adamdar bir-birimen renjispeýge, úılerine qonaqqa shaqyryp, barlyq dámdisin meımanynyń aldyna qoıýǵa tyrysady dep oılaımyn.
Shuǵyla Qadyr, 10-synyp oqýshysy:
– Bul meıramda atalar batasyn berip, jastar qolyn jaıyp, qurmet bildiredi. Naýryzda adamgershilik pen qaıyrymdylyq basty oryn alady. Muqtaj jandarǵa kómek kórsetilip, jetim-jesirlerge qamqorlyq jasalady. Demek Naýryz – tek tabıǵattyń ǵana emes, rýhanı qundylyqtardyń da jańǵyrý merekesi.