Qazaqstan Respýblıkasynyń Halyq ártisi Roza Baǵlanovanyń 100 jyldyq mereıtoıyn merekeleý aıasynda Almaty qalasynyń ákimi Erbolat Dosaevtyń, Qazaqstannyń Eńbek Eri, teatr jáne kıno akteri Asanáli Áshimovtyń, Qazaqstannyń Eńbek Eri Álibek Dinishevtiń, Qazaqstannyń Halyq ártisi Altynbek Qorazbaevtyń, mádenıet qaıratkeri Qýanysh Ábdiqalymovtyń, fılolog ári aqyn Aqqushtap Baqtygereevanyń, ánshiniń týǵandary men jaqyndary – uly Tájen men kelini Maral Baǵlanovtardyń qatysýymen áıgili ánshi eskertkishiniń saltanatty ashylý rásimi ótti, dep habarlaıdy Almaty-akshamy.kz
Medeý aýdanyndaǵy Jambyl atyndaǵy Qazaq memlekettik fılarmonıasy ǵımaratynyń aldyna bıiktigi 4,8 metr qola eskertkish ornatyldy, fılarmonıa qabyrǵasynda 1949-1960 jyldar aralyǵynda Roza Baǵlanova óner kórsetken edi. Qola jáne granıtten jasalǵan eskertkishtiń avtorlary – músinshiler D.Aǵzamov, Ý.Aqjoltaı, A.Jamhan, A.Qabyl.
Eskertkishti ashý rásimi barysynda Almaty qalasynyń ákimi Erbolat Dosaev Roza Baǵlanovanyń qazaq halyq mýzykasy men Qazaqstan kompozıtorlarynyń shyǵarmashylyǵyn damytýǵa jáne nasıhattaýǵa qosqan baǵa jetpes zor úlesin atap ótti.
«Bizdiń uly ánshimiz Roza Baǵlanovaǵa eskertkish ornatý – onyń murasyn qurmetteý jáne este saqtaý. Ol mýzyka óneriniń shyrqaý bıigindegi jaryq juldyz boldy. Onyń erekshe daýysy men talanty bizdiń halqymyzdyń baǵa jetpes qundylyǵyna aınaldy. Ánshiniń súıikti qalasy – Almatyda 100 jyldyq mereıtoı aıasynda Roza Baǵlanovanyń esimin máńgi este qaldyrý úshin eskertkish ornatqanymyzǵa sheksiz qýanyshtymyn», – dedi Erbolat Dosaev.
Qala basshysy sulýlyq pen bıik ónerdiń sımvolyna aınalǵan Roza Baǵlanovanyń mádenıet pen ónerdiń qara shańyraǵy – Almaty qalasynda eskertkish-beınesiniń turýy qaı jaǵynan da tarıhı ádilettilik ekenin aıtty.
«Osynaý eńseli eskertkishtiń avtorlary – Eshkenov Ǵazız, Jamhan Aıdar jáne Aqjoltaı Ulaǵat ortamyzda. Oraıly sátti paıdalana otyryp, ǵajaıyp músindi somdap shyqqan óner ıelerine alǵys aıtqym keledi. Barsha qala turǵyndaryn, zıaly qaýymdy, jınalǵan jurtshylyqty búgingi eńseli eskertkishtiń ashylýymen shyn júrekten quttyqtaımyn»! - dedi Erbolat Dosaev.
Búgin Almatyda Roza Baǵlanovanyń 100 jyldyǵyna oraı Respýblıka Saraıynda «Aqmańdaılym» atty merekelik konsert ótti. Aty ańyzǵa aınalǵan ánshiniń repertýaryndaǵy ánderdi tanymal qazaqstandyq ártister oryndady.
