QR Memlekettik qyzmet isteri agenttiginiń Almaty qalasy boıynsha departamenti men Almaty qalasy ákimdigi birlesip ótkizgen óńirlik kadr komısıasynyń otyrysy qala ákimi Erbolat Dosaevtyń tóraǵalyǵymen ótti. Komısıa barysynda Óńirlik kadr rezervine kandıdattardy irikteý júrgizildi, dep habarlaıdy aqshamnews.kz
Qala ákimi Erbolat Dosaev irikteýdiń alǵashqy úsh kezeńinen ótken úmitkerlerdi quttyqtap, olarǵa sáttilik tiledi. Barlyǵy 43 úmitker zańnamany bilýge, jeke qasıetteri men quzyretterin baǵalaýǵa arnalǵan testileýden ótti.
«Elimizdiń Prezıdenti Qasym-Jomart Toqaev talantty jáne maqsatty jastar úshin áleýmettik lıftterdiń mańyzdylyǵyn birneshe ret atap ótti. Óńirlik kadr rezervi bizdiń úmitkerler úshin dál osyndaı lıft bolatynyna senimdimin», - dedi Almaty ákimi.
İrikteý barysynda úmitkerler ózderiniń prezentasıalyq jobalaryn usynyp, olardyń ıdeıalarynyń máni men maqsattaryn, iske asyrý kezeńderin, yqtımal problemalar men kútiletin nátıjelerdi jáne olardy sheshý joldaryn baıandady.
İrikteý nátıjesinde 30 rezervshi Óńirlik kadr rezervine qabyldanatyn bolady. Olar eki jyl ishinde konkýrssyz qalanyń jergilikti atqarýshy organdaryndaǵy túrli bos laýazymdarǵa úmitker bola alady.
QR Memlekettik qyzmet isteri agenttiginiń Almaty qalasy boıynsha departament basshysy Shynaraı Álimhan óńirlik komısıa tóraǵasynyń orynbasary bolyp tabylady. Komısıa quramyna sondaı-aq qalalyq máslıhat tóraǵasy Meıirjan Otynshıev, Almaty qalasy boıynsha Tekserý komısıasynyń tóraǵasy Altaı Berdiqulov jáne qala ákimi apparatynyń basshysy Aıdar Jaqybaev kirdi.
Komısıa qyzmetiniń ashyqtyǵyn qamtamasyz etý maqsatynda irikteýdiń sońǵy kezeńinde Memlekettik qyzmet isteri departamenti táýelsiz salalyq sarapshylardy tartty.
«İrikteý kezeńderi óte kúrdeli boldy. Ár kandıdattyń quzyreti tekserildi. Biz 3 kún ishinde komısıa otyrysyn ótkizip, 30 laıyqty kandıdatty iriktep alýymyz kerek. Óńirlik kadr rezerviniń ereksheligi - árbir kandıdat óz ereksheligi boıynsha ózderine jaqyn salalyq baǵyttar boıynsha ótinish bergen», - dep atap ótti Memlekettik qyzmet isteri departamentiniń basshysy Shynaraı Álimhan.
Táýelsiz sarapshylar barlyq kandıdattar úshin ashyqtyq pen ádil irikteýdiń qamtamasyz etilgenin atap ótti.
«Barlyq azamattar konkýrsqa qatysýǵa quqyly boldy, jáne biz sarapshylar retinde qatysqan sońǵy kezeńde biz memlekettik qyzmetshilerden basqa bıznes ókilderi, muǵalimder, dárigerler, akademıalyq sala men kvazımemlekettik sektor ókilderiniń de bolǵanyn kórdik. Barlyǵyna birdeı qoljetimdilik qamtamasyz etildi. Ashyqtyq pen ádildik qamtamasyz etildi», - dedi «Almaty Azamattyq alánsy» ZTB-niń tóraǵasy Qaıyrjan Ábdihalyqov.
Anyqtama: Óńirlik kadr rezervine irikteýdiń birinshi kezeńi 1 naýryzda bastaldy. İrikteýge joǵary bilimi jáne jalpy jumys ótili keminde 3 jyl, 35 jastan aspaǵan Qazaqstan azamattary qatysa alady. Almaty qalasy boıynsha birinshi kezeńde 261 úmitker qujattaryn tapsyrdy.