Almatyda jastardy kóptep dástúrli sportqa tartýdy kózdeıtin «Youth Nomads» deıtin áleýmettik joba bastaldy. Óńirlik komýnıkasıalar qyzmetinde ótken pres-konferensıada uıymdastyrýshylar kópshilikti jobanyń mán-jaıymen tanystyrdy, dep habarlaıdy aqshamnews.kz
Almatynyń jastar saıasaty basqarmasynyń qoldaýymen iske asyp jatqan bul joba – qazir jumyssyz otyrǵan, esh jerde oqymaıtyn NEET sanatyndaǵy jastarǵa baǵyttalǵan. Bastamanyń maqsaty – ulttyq sport pen dástúr arqyly olardy áleýmettik beıimdeýge atsalysý.
«Bul jastardy áleýmetke jaqyndastyryp, qoǵamǵa beıimdep, olardyń jańa kásipti ıgerýine jol ashatyn, jastardy ulttyq sport arqyly damytýdy kózdeıtin úlken joba. Jastardy salaýatty ómir saltyn ustanýǵa shaqyratyn jol», — dedi jastar saıasaty basqarmasy bastyǵynyń orynbasary Almaz Keńesbaı.
Bul jobada birneshe ulttyq sport túrlerin qamtyǵan festıvál ótpek. Almatynyń úlken-úlken bazarlarynda jumys isteıtin jastar qazaqsha kúresten, arqan tartýdan, asyq atýdan, toǵyzqumalaqtan ózara jarysqa túsedi onda. Alǵashqy kezeńde irikteýden ótip, aqtyq aıqas 28 mamyr kúni ótip, sol kúni jeńgenderi syılyq alady.
«Youth Nomads» jobasynyń jetekshisi Taýasar Murathannyń aıtýynsha, festıválda mádenı baǵdarlamalar: qolónershilerdiń buıymdary qoıylǵan kórme, konsert pen belsendi jastardyń master-klasy da ótpek. Bul jastardyń shabytyn shyńdap, eldiń baı mádenıetine kiriktire túspek olardy.
«Youth Nomads — festıvál ǵana emes, jastar men qoǵamnyń arasyndaǵy áleýmettik kópir de. Sport, dástúr, ujymdyq jumys arqyly olar qoǵamnan óz ornyn taýyp, ómirge úmitpen, jańasha qaraı bastaıdy», — deıdi uıymdastyrýshylar.
Joba joq degende qalanyń eki úlken bazaryn qamtymaq. Jobanyń sońynda ákimdiktiń ókilderi, máslıhat depýtattary, blogerler men belsendiler qazylyq jasap, kózge túsken jastardy marapattaıdy.
Uıymdastyrýshylardyń aıtýynsha, jobaǵa qazirdiń ózinde jastar men álemettik qurylymdar qatty qyzyǵyp, qatysýǵa ótinish bildirgen.