2022 jyly 15 naýryzda ál-Farabı atyndaǵy Qazaq ulttyq ýnıversıteti Almaty qalasy ákimdiginiń qoldaýymen «Almaty qalasy mýzeıler birlestigi» KMQK jáne «Tańbaly» memlekettik qoryq-mýzeıimen birlesken «Naýryz: dástúr jáne jańǵyrý» kórmesin jáne ǵylymı-tájirıbelik konferensıasyn ótkizedi, dep habarlaıdy Almaty-akshamy.kz
Qazaqstan Respýblıkasynyń Prezıdenti Qasym-Jomart Toqaevtyń «Táýelsizdik bárinen qymbat» maqalasyndaǵy Naýryz meıramyn toılaý tujyrymdamasynda: «Naýryz meıramynyń negizgi maqsaty – Qazaqstan jerinde beıbitshilik pen dostyqty nyǵaıtý, ulttyq biregeılikti saqtaý, otbasylyq qundylyqtardy dáripteý, qorshaǵan ortaǵa uqypty qaraýdy qalyptastyrý», - dep atap ótilgen.
Kórmede qazaq halqynyń dástúrli turmys-saltyn nasıhattaıtyn, baı materıaldyq jáne rýhanı mádenıetin kórsetetin kıiz úı jáne ishki jabdyqtary, Almaty qalasyndaǵy naýryz merekeleriniń toılanýy jóninde fotosýretter qoıylady. Merekelik is-shara qonaqtaryna naýryzkóje taratylyp, zergerlik ónerinen sheberlik saǵaty ótkiziledi.
Konferensıa jumysynyń barysynda naýryz merekesiniń jańǵyrǵan qazaq qoǵamyna áseri, ulttyq qundylyqtar, ulttyq biregeılik máni taldanady.
Konferensıaǵa otandyq tarıhshy, etnolog, arheolog, mýzeıtanýshy ǵalymdar men memlekettik jáne qoǵamdyq uıymdardyń ókilderi, sarapshylar, BAQ ókilderi qatysady.