Almatyda týbdıspanserdiń dýalyn attap, syrtqa qashyp bara jatqan naýqastyń sýreti jelige shyqty.
Jelige shyqqan aqparatqa sáıkes, Almaty týberkýlez dıspanseriniń naýqastary syrtqa erkin shyǵyp, kóshede qydyryp júredi, dep habarlaıdy Almaty-akshamy.kz.
«Bul jerde balabaqsha men dúkender bar. Jergilikti turǵyndar shara qabyldaýdy talap etedi» delingen vıdeodaǵy jazbada.
Almaty qalasynyń ftızıopýlmonologıa ortalyǵynyń ákimshiligi atalǵan oqıǵaǵa qatysty stasıonar komısıasy naýqasty tekserip, onymen áńgime júrgizgenin, sondaı-aq, aýrýhana rejımin saqtamaǵany jóninde hattama toltyrylǵanyn habarlady.
«Aýrýhanada pasıentterge baqylaý júrgiziledi, barlyq qyzmetkerlerge pasıentterdi qajet bolǵan jaǵdaıda ǵana ótkizý týraly nusqaý berilgen. Sondaı-aq, Degdar kóshesi, 45 mekenjaıynda ornalasqan Ftızıopýlmonologıa ortalyǵyna týberkýlezdiń juqpaly jáne juqpaly emes túrimen de naýqastar túsetinin aıtý kerek. Eki aptalyq emdeýden soń naýqastar basqa adamdarǵa qaýip tóndirmeıdi, olar ambýlatorlyq em ala alady» dep jaýap berdi aýrýhana ákimshiligi.
Sondaı-aq aýrýhananyń málimetinshe, bakterıalyq bólinýi joq pasıent qajettiligi boıynsha ruqsat qaǵazy arqyly syrtqa shyǵýyna múmkindigi bar ekenin habarlady.
«Eger naýqasta bakterıalyq bóliný jalǵassa, aýmaqtan syrtqa shyǵýǵa ruqsat etilmeıdi. Desek te, rejımdi buzýshylar kezdesedi. Ár naýqas stasıonarǵa túsken kezde olarmen aýrýhanalyq rejımdi saqtaý jóninde áńgime júrgiziledi» dep habarlady Almaty qalasynyń ftızıopýlmonologıa ortalyǵynyń ákimshiligi.