2023 jyly Almatyda sot oryndaýshylarynyń oryndaýynda alıment óndirip alý týraly 22 415 atqarýshylyq is júrgizildi. Onyń ishinde ata-analyq mindetterin oryndamaǵany úshin 159 boryshker ákimshilik jaýapkershilikke tartyldy. Bul týraly Óńirlik komýnıkasıalar qyzmetinde ótken brıfıńte Almaty qalasy Ádilet departamentiniń ókilderi aıtty.
Departamenttiń basshysy Balaım Kesebaevanyń aıtýynsha, alıment boıynsha boryshkerler balalaryn asyraýdan bas tartyp, naqty qarjylyq múmkindikteri bolsa da, tabystary men múlkin jasyrady.
«İshki ister organdaryna boryshkerlerdi qylmystyq jaýapkershilikke tartý týraly 133 usynys joldandy (QR boıynsha 1242)», - dep habarlady spıker.
Sonymen qatar, boryshkerlerge qaryzdaryna baılanysty respýblıkadan shyǵýǵa 1328 ýaqytsha tyıym salyndy.
Sondaı-aq, Departamentte jumyssyz boryshkerlerdi jumysqa ornalastyrý jáne kámeletke tolmaǵan balalardyń paıdasyna alıment óndirip alý boıynsha sharalar qabyldanýda.
«Boryshkerdiń turaqty tabysy men múlkiniń bolmaýyna baılanysty alıment óndirip alý múmkin bolmaıtyn jaǵdaılar bar. Osyǵan baılanysty, biz jumyspen qamtý jáne áleýmettik baǵdarlamalar departamentimen birlesip bos oryndar jármeńkesin (8 jármeńke) ótkizý arqyly olardy jumysqa ornalastyrý boıynsha sharalar qabyldaımyz, nátıjesinde 780 boryshker jumysqa ornalastyryldy», - dep atap ótti B. Kesebaeva.
Almatyda áleýmettik mańyzy bar sanattaǵy ister boıynsha barlyǵy 23 615 atqarýshylyq is júrgizildi, alımentten basqa, bul jalaqy, zeınetaqy jáne járdemaqy óndirip alý.
2023 jyly Departament 230 boryshkerge qatysty ákimshilik quqyq buzýshylyq týraly hattamalar jasady, 68 ákimshilik qamaýǵa alý qoldanyldy. Boryshkerlerdi qylmystyq jaýapkershilikke tartý týraly 137 usynys joldandy.
Almaty qalasynda 24 memlekettik jáne 288 jeke sot oryndaýshylary jumys isteıdi, olar jyl basynan beri 731 051 atqarýshylyq is júrgizdi (608 441). Onyń edáýir bóligin, 354 000-nan astam jaǵdaı (354 067) zańdy tulǵalardyń paıdasyna óndirip alýlar quraıdy.