Adam quqyqtary jónindegi ýákildiń baspasóz qyzmeti Almatyda múmkindigi shekteýli azamatqa kólik turaǵyn tólemegeni úshin zańsyz aıyppul salynǵanyn málim etti, dep habarlaıdy almaty-akshamy.kz.
- Adam quqyqtary jónindegi ýákildiń Almatydaǵy ókiline 2-top múgedektigi bar aryzdanýshy habarlasty. Onyń aıtýynsha, aqyly avtoturaq onyń úıiniń janyndaǵy, kireberistegi aýmaqta ornalasqan. Ótinish berýshi densaýlyǵy boıynsha erekshe qajettilikteri bar adam bolǵandyqtan, ol óz kóligin kireberistiń janyna qoıýǵa májbúr, biraq vıdeobot oǵan turaq aqysyn tólemegeni úshin avtomatty túrde aıyppul salǵan. Oǵan qatysty barlyǵy 8 ákimshilik hattama toltyrylǵan. Ýákil ókiliniń bastamasymen bul másele ákimdik pen «Almaty parkıng» kompanıasynyń qatysýymen ótken jıynda talqylandy. Jıyn qorytyndysy boıynsha ákimshilik ókilderi máseleni 3-toqsannyń sońyna deıin sheship, ǵımarat turǵyndary úshin kólik turaǵyn tegin etýge ýáde berdi, - dep habarlady mekemeden.
Sondaı-aq AQJÝ baspasóz qyzmeti Almaty Ákimshilik polısıa basqarmasyna aryzdanýshynyń quqyq buzýshylyqtaryn joıý týraly hat joldanyp, qazirgi ýaqytta oǵan qatysty barlyq uıǵarymdardyń kúshi tolyǵymen joıylǵanyn atap ótti. Al buryn óndirip alynǵan soma turǵynnyń óz shotyna qaıtarylǵan.