Aıta ketsek, aǵymdaǵy jyldyń 1 qazanynda 2021 jylǵa arnalǵan jeke múlik salyǵyn tóleý merzimi aıaqtalady.
Óńirlik komýnıkasıalar qyzmetiniń alańynda Almaty qalasy boıynsha Memlekettik kirister departamentiniń óndiristik emes tólemder basqarmasynyń basshysy Qýanysh Túmenbaevtyń qatysýymen brıfıń ótip, múlik salyǵyna qatysty suraqtarǵa jaýap berdi, dep habarlaıdy Almaty-akshamy.kz
Menshiginde turǵyn úıleri, páterleri, saıajaılary, garajdary jáne basqa da ǵımarattary bar tulǵalar jeke tulǵalardyń múlkine salyq tóleýshiler bolyp tabylady.
«Árbir salyq salý obektisiniń quny turǵyn úıdiń paıdaly alańyn, aımaqtarǵa bólý koefısıentin, amortızasıany jáne t.b. eskere otyryp anyqtalady. Osy málimetter negizinde salyq organdary salyq stavkasyn salyq salýdyń qunyna qoldaný arqyly obekti, jyl saıyn 1 shildege deıin múlik salyǵynyń somasyn esepteıdi. Salyq kodeksinde salyqtyń progresıvti stavkasy qarastyrylǵan, nysannyń quny neǵurlym joǵary bolsa, salyq mólsheri de soǵurlym kóp bolady», - dep túsindirdi Q.Túmenbaev.
Salyqtyń eseptelgen somasy negizinde jeke tulǵalarǵa tapsyrys hatpen habarlamamen birge jiberý arqyly, salyq tóleýshiniń jeke kabınetine elektrondy túrde, sondaı-aq mobıldi qosymsha arqyly elektrondy túrde jetkiziletin habarlamalar qalyptastyrylady. Azamattarǵa yńǵaıly bolý úshin olar Alseco komýnaldyq tólemderi arqyly, sondaı-aq ekinshi deńgeıli bankterdiń elektrondy ótinishteri arqyly habardar etiledi. Jeke tulǵalar 1 qazannan keshiktirmeı habarlamada kórsetilgen salyq somasyn tóleýge mindetti.
Mysaly: eger páter quny 10 mln teńgeni qurasa, onda salyq somasy 11 600 teńgeni quraıdy. Quny 50 mln teńge bolatyn páter boıynsha salyq 196 600 teńgeni quraıdy.
«Eger salyq kezeńi ishinde salyq salý obektisi menshik quqyǵynda on eki aıdan az bolsa, mundaı obektiler boıynsha tólenýge jatatyn múlikke salynatyn salyq salyq somasyn on ekige bólý jáne salyq salý obektisiniń menshik quqyǵynda bolýynyń naqty kezeńi aılarynyń sanyna kóbeıtý jolymen esepteletinin atap ótý qajet», - dep jalǵastyrdy MKD spıkeri.
Birneshe jeke tulǵalardyń ortaq úlestik menshigindegi salyq salý obektisi úshin salyq olardyń osy múliktegi úlesine proporsıonaldy túrde esepteledi.
Salyq salý obektisi joıylǵan, qıratylǵan, súrilgen jaǵdaıda ýákiletti memlekettik organ bergen joıylý, qıraý, buzý faktisin rastaıtyn qujattar bolǵan kezde salyq somasy qaıta esepteledi.
MKD ókili jeke tulǵalardyń qaısysy múlik salyǵyn tóleýden bosatylatynyn atap ótti. Olardyń ishinde: Keńes Odaǵynyń Batyrlary, Sosıalısik Eńbek Erleri, «Halyq qaharmany», «Qazaqstannyń Eńbek Eri» ataqtaryna ıe bolǵan, úsh dárejeli Dańq ordenimen jáne «Otan» ordenimen marapattalǵan adamdar, Uly Otan soǵysynyń ardagerleri, olarǵa teńestirilgen ardagerler, jetim balalar jáne ata-anasynyń qamqorlyǵynsyz qalǵan balalar 18 jasqa tolǵanǵa deıin; «Batyr Ana» ataǵyna ıe bolǵan, «Altyn alqa» alqasymen nagradtalǵan kóp balaly analar jáne basqalar.
Jeke tulǵalardyń múlik salyǵyn tóleýshiler bolyp tabylmaıtyn tulǵalardyń tolyq tizbesi Salyq kodeksiniń 526-babynda kózdelgen.
Bul rette jyl saıyn salyq organdarynda jeńildikti rastaýdyń qajeti joq. Salyq organdary jyl saıyn QR QM MKK-den jeńildik berilgen adamdar boıynsha málimetter alady.
«Búginde Almaty qalasy boıynsha jeke tulǵalardyń múlkine salyq salynatyn jeke úılerdiń, páterlerdiń, saıajaılar men garajdardyń sany 616 365 quraıdy, baǵalaý quny 3063 mlrd teńge. Ótken jylmen salystyrǵanda salyq salý obektileriniń sany 32 171-ge artyp, baǵalaý quny 258 mlrd teńgeni qurady. Aıta ketý kerek, jańa salyq salý nysandarynyń jartysy – 15 973 Naýryzbaı aýdanyna tıesili», - dedi Q.Túmenbaev.
Bıylǵy jyly esepteýler menshik quqyǵynda 3,9 mlrd teńge somaǵa 616 365 salyq salý obektisi bar 505 myń tulǵa boıynsha júrgizildi, ótken jylmen salystyrǵanda eseptelgen salyq somasy 300 mln teńgege artyq (2021 jyly esepteýler 3,6 mlrd teńge somaǵa 584 194 obekt boıynsha júrgizildi).
23.09.2022 j. jaǵdaı boıynsha 505 myń tulǵanyń ishinde 2021 jyly múlik salyǵyn tóleý boıynsha mindettemelerdi 440 myń adam jalpy somasy 2,9 mlrd teńgege oryndady. Bul rette 945 mln teńge salyq somasy bar 65 myńnan astam tulǵa jeke tulǵalardyń múlik salyǵyn tóleý boıynsha mindettemelerin áli oryndamaǵan.