Shahanov erterekte kótergen ádebı, qoǵamdyq jáne saıası ózekti máseleler sóz boldy
Halyq jazýshysy, Qazaqstannyń Eńbek Eri, aqyn Muhtar Shahanovtyń 80 jyldyq mereıtoıyna oraı Ulttyq qundylyqtar asosıasıasy «Jigerlendirý» atty forým ótkizdi, dep habarlaıdy Almaty-akshamy.kz Baq.kz-ke silteme jasap.
Jıyn barysynda Shahanov erterekte kótergen ádebı, qoǵamdyq jáne saıası ózekti máseleler sóz boldy.
«Jigerlendirý» forýmy «Shahanov jáne qazaq ádebıeti», «Ulttyq ıdeologıa» men «Mádenıet» atty úsh bólikpen ótti. Taqyryp boıynsha spıkerler ózekti máselelerdi kóterip onyń sheshimin usyndy.
Jıyn barysynda aqyn densaýlyǵyna baılanysty em alyp júrgenin, jaqyn arada Túrkıaǵa baratynyn jetkizdi.
Aqyn, profesor Baýyrjan Jaqyp bul jıyn aqyn mereıtoıynyń bastaýy ekenin aıta kele, aldaǵy ýaqytta Jazýshylar odaǵynda aýqymda shara ótetinin jetkizdi. Sonymen qatar sóz arasynda aqyn Muhtar Shahanovtyń túrik álemindegi keremet bedeline kýá bolǵanyn aıtyp berdi.
«Buǵan deıin Muhań óleńderim dúnıejúziniń 68 tiline aýdaryldy dep aıtatyn, qazir odan da kóp bolýy kerek. Túrkıada Shyńǵys Aıtmatov aǵamyzdyń shyǵarmasyna arnalǵan úlken festıvál boldy. Sonda túrik jurtshylyǵynyń Muhtar Shahanovtyń poezıasyna degen úlken qyzýshylyǵyna kýá boldym. Jer-jerden túrki halyqtarynyń ókilderi jınaldy. Sol jıynda Shyńǵys pen Muhtar aǵamyz qoltyqtasyp, Ata túriktiń eskertkishine gúl qoıýǵa bara jatqan kezde túrikter kósheniń boıynda turyp, úıiniń balkonyna shyǵyp turyp qol soǵyp, qurmet kórsetip turdy. Biri qyrǵyzdyń, biri qazaqtyń atyn álemge tanytqan eki alyp»,-dedi B. Jaqyp.
Qazaqstannyń eńbek sińirgen qaıratkeri Asyly Osman aqyn Muhtar Shahanov ulttyq qundylyq pen ana tilimiz úshin shyryldap júrgen jan ekenin atap ótti.
«Búgingi jıynnyń atynyń ózi erekshe, «jigerlendirý» degenimizdiń ózi Muhańnyń tula boıynda tunyp tur. Ultyna degen, jerine degen jylylyq, súıispenshilik bar. Muhańnyń boıyndaǵydaı qaısarlyq, bilgirlik, ata-salt, danalyq barlyq qazaqta bolǵanda, onda bul Qazaqstan búgin Qazaq eli bolyp eldi ózine qaraı ertip ketken bolar edi»,-dedi ol.