2023 jyly Almaty qalasynda múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda 684 áleýmettik ınfraqurylym nysany tolyq beıimdeldi.
Qazirgi ýaqytta elimizde 2025 jylǵa deıin Qazaqstan Respýblıkasynda múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar, «Amanat» partıasynyń 2023 – 2027 jyldardaǵy jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylýda, dep habarlaıdy Almaty-akshamy.kz QR Eńbek jáne halyqty áleýmettik qorǵaý mınıstrligine silteme jasap.
Jobada qoljetimdiliktiń ınteraktıvti kartasy saıtyna engizilgen el boıynsha beıimdelýge tıis 35 myńnan astam basym obektiler aıqyndaldy. 2021 – 2022 jyldary 8 myńnan astam nysan beıimdeldi. 2023 – 2027 jyldar kezeńinde jyl saıyn keminde 5 myń obekt (5 jylda 27 myń) beıimdelýi tıis. 2021 – 2022 jyldardy qosa alǵanda, 2023 jyldyń qorytyndysy boıynsha 13 857 obekt osy talapqa sáıkestendirildi.
Almaty qalasynda 2023 jyly beıimdelýge josparlanǵan 721 obektiniń ishinen jergilikti atqarýshy organdar 684 nysandy múgedektigi bar adamdardyń barlyq sanattary úshin qol jetimdi etý jumystaryn júrgizdi:
- bilim berý – 301 (mektepter, balabaqshalar);
- densaýlyq saqtaý – 233 (aýdandyq/qalalyq aýrýhanalar, feldsherlik-akýsherlik pýnktter, ambýlatorıalar);
- memlekettik mekemeler – 59 (qalalyq, aýdandyq, aýyldyq ákimdikter men bólimder);
- mádenıet obektileri – 16 (mádenıet úıleri, teatrlar jáne t. b.);
- sport nysandary – 4 (sport zaldary, sport saraılary jáne t. b.);
- áleýmettik qorǵaý obektileri – 10;
– qyzmet kórsetý salasynda – 61.
«Jalpy qala boıynsha múgedektigi bar adamdar úshin jaǵdaı jaqsaryp, qajetti jaǵdaılar jasalýda. Menshik ıeleri obektilerdi qurylys normalaryna sáıkes keltirýge tyrysady. Kóptegen kásipkerler jáne memlekettik mekemeler shaǵymdar men usynystardy eskere otyryp, kire beristerdi jetildirýde. Mysaly, Gagarın kóshesi, 206 mekenjaıyndaǵy №17 emhanaǵa barǵan kezde densaýlyq saqtaý mekemesiniń qoljetimdiligi kóńil qýantady, esik jaqtaýlary ólshemderge sáıkes keledi, yńǵaıly lıft te qarastyrylǵan. Sondaı-aq jaqynda Kaspıı bankiniń bólimshesine bardym, onda kirý toby qaıta jańartylǵan: kirý alańy keńeıtilip, kireberis esikteri aýystyrylǵan, kreslo-arbadaǵy múgedektigi bar adamdarǵa arnalǵan arnaıy kasa, taktıldi plıtkalar men kórsetkishter ornatylǵan eken. Bul qala turǵyndarynyń, onyń ishinde bizdiń de eń kóp baratyn oryndarymyz», – dedi birinshi top múgedektigi bar Ulan İńkárbekov degen azamat.
Budan basqa 2023 jyly memlekettik baqylaý sheńberinde QR EHÁQM Eńbek jáne áleýmettik qorǵaý komıtetiniń Almaty qalasy boıynsha aýmaqtyq departamenti memlekettik basqarý, densaýlyq saqtaý, áleýmettik qorǵaý, mádenıet jáne t. b. salalardaǵy áleýmettik ınfraqurylym obektilerine 112 tekserý júrgizdi, onyń ishinde: 43 – jospardan tys, 58 – profılaktıkalyq baqylaý sheńberinde jáne prokýratýranyń talaby boıynsha 11 tekserý boldy. Tekserý qorytyndysy boıynsha anyqtalǵan buzýshylyqtardy joıý týraly 97 uıǵarym berildi, 10 mln teńgeden astam somaǵa 17 ákimshilik aıyppul salyndy.
Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpaı joıý týraly nusqamalar ǵana beriletinin atap ótý qajet. Nusqama belgilengen merzimde oryndalmaǵan jaǵdaıda ǵana aıyppul salynady.