№136 mektep-gımnazıada qala mektepteri ustazdarynyń basyn qosqan «Mirjaqyp oqýlary» atty shyǵarmashylyq baıqaý ótti. İs-sharany Almaly aýdany ákiminiń apparaty men aýdandyq bilim bólimi uıymdastyrdy, - dep habarlaıdy Aqshamnews.kz.
Baǵdarlama bastalar aldynda qonaqtarǵa Mirjaqyp Dýlatov atyndaǵy mektep mýzeıine shaǵyn ekskýrsıa ótkizildi. Kelýshilerge aǵartýshynyń jeke zattary, sırek qujattary, qoljazbalary men onyń ómiri men qoǵamdyq qyzmetine qatysty derekter tanystyryldy. Bastaýysh synyptyń eki oqýshysy Dýlatovtyń ómirbaıanyn baıandap, óleńderin oqydy.
İs-sharanyń resmı bólimi akt zalynda bastaýysh synyp oqýshylarynyń oryndaýyndaǵy «Alash marshy» ánimen ashyldy. Hor bolyp shyrqalǵan bul týyndy baıqaýdyń shymyldyǵyn túrip, Qazaqstan tarıhyndaǵy Alash qozǵalysynyń mańyzy men Mirjaqyp Dýlatovtyń ulttyń rýhyn oıatýdaǵy rólin eske saldy.
«Búgin biz uly aqynnyń týǵan kúninde jınalyp, eldiń erteńin oılap, ult bolashaǵy úshin kúresken Alash qaıratkerlerin eske alyp otyrmyz. Mirjaqyp Dýlatovtyń «Oıan, qazaq!» degen úndeýi búgin de ózekti. Baıqaýdyń maqsaty – óskeleń urpaqty ata-baba murasymen tanystyryp, áıgili tulǵanyń ómiri men shyǵarmashylyǵyn nasıhattaý, ony búgingi jas býynnyń tárbıesimen sabaqtastyrý. Dýlatovtyń ıdeıalary qazaqtyń ulttyq sanasynyń qalyptasýyna jáne eldi aǵartý arqyly biriktirýge zor yqpal etti», – dedi quttyqtaý sózinde Mirjaqyp Dýlatovtyń tarıhı tulǵa retindegi máni men onyń murasyn urpaqqa jetkizýdiń mańyzyn ataǵan Almaly aýdany ákiminiń orynbasary Erbol Qaldarbekov.
Sondaı-aq, ol muǵalimder qazir de aǵartýshylyq mısıany jalǵastyryp, jastarǵa bilim men qundylyqty boıyna sińirýde úlken ról atqaratynyn aıtty.
Mektep ujymy «Baqytsyz Jamal» romany boıynsha sahnalyq qoıylym kórsetip, qazaq prozasynyń alǵashqy romany sanalatyn bul týyndynyń atmosferasyn kórermenge jetkize bildi. Odan keıin tórtinshi synyp oqýshylary halyq bıin bılep, pedagogtar mýzykalyq nómirler usyndy.
№136 mektep-gımnazıa dırektorynyń tárbıe isi jónindegi orynbasary Maıra Turǵanbaeva bul is-sharanyń aýqymyn, baıqaýǵa 180 adam qatysqanyn atady. Onyń aıtýynsha, baıqaý alǵash ret ótkizilip otyr, bolashaqta jyl saıynǵy dástúrge aınalýy múmkin. Sonymen qatar 855 oqýshy bilim alyp jatqan gımnazıadaǵy oqýshylardyń Mirjaqyp Dýlatovtyń murasymen tanysýy erekshe mańyzdy ekenin jetkizdi.