Almaty qalasynda «Taza Qazaqstan» baǵdarlamasy aıasynda uıymdastyrylǵan «Almaty – ortaq úıimiz» ekologıalyq aksıasy jalǵasýda. Jobanyń basty baǵyttarynyń biri – merzimi ótken dári-dármekterdi qaýipsiz joıý. Bul týraly Aqshamnews.kz saıty habarlaıdy.
Belgili telejúrgizýshi jáne bloger Amınata Ýedraogo bul bastamany qoldap, qala turǵyndaryn belsendi qatysýǵa shaqyrdy. Onyń aıtýynsha, bul tek ekologıany qorǵaý emes, halyq densaýlyǵyn saqtaýǵa baǵyttalǵan mańyzdy qadam.
Merzimi ótken dáriler – jasyryn qaýip kózi
Amınata Ýedraogo atap ótkendeı, jaramdylyq merzimi ótip ketken dárilerdi qoqysqa tastaý – úlken qatelik. Olar qorshaǵan ortaǵa zıan keltirýmen qatar, adam ómirine de qaýip tóndirýi múmkin.
«Qoldanys merzimi ótken dári-dármekter topyraq pen sýdy ýlandyryp, ekojúıege zıanyn tıgizedi. Bul – kózge kórinbeıtin, biraq qaýipti proses. Sondyqtan árbir turǵyn óz úıinen bastaý alýy tıis», – deıdi telejúrgizýshi.
Dárilerdi qaıda tapsyrýǵa bolady?
Qala boıynsha birqatar emhanalarda arnaıy qabyldaý jáshikteri ornatylǵan, onda turǵyndar jaramsyz dárilerdi tegin jáne qaýipsiz túrde ótkize alady. Bul joba 2023 jyly bastalyp, búginde Almatynyń birneshe aýdandaryn qamtyp otyr. Dárilerdi qabyldaıtyn mekemeler tizimi jergilikti ákimdikter men emhanalardyń resmı paraqshalarynda jarıalanǵan.
«Almaty – ortaq úıimiz»: ár turǵynnyń úlesi mańyzdy
Ekologıalyq joba Almaty qalasynyń tazalyǵy men turǵyndardyń densaýlyǵyn saqtaýǵa baǵyttalǵan. Bul – árbir azamattyń jeke jaýapkershiligi men qoǵam aldyndaǵy mindetin eske salatyn mańyzdy bastama.
«Biz bárimiz bir úıde – Almatyda turamyz. Ony taza, qaýipsiz, salaýatty etý – bárimizdiń qolymyzda», – deıdi Amınata Ýedraogo.
Merzimi ótken dári-dármekti durys joıý – ekologıany qorǵaýdyń jáne salaýatty qoǵam qalyptastyrýdyń mańyzdy bóligi. Almaty qalasynda bul baǵyttaǵy jumystar belsendi júrip jatyr. Almatylyqtar, úıińizdegi jaramsyz dárilerdi emhanaǵa aparyńyz, tabıǵatty qorǵaýǵa jáne qalanyń bolashaǵyna úles qosyńyz!