QR Prezıdentiniń janyndaǵy Memlekettik basqarý akademıasynyń Almaty qalasy boıynsha fılıalynyń bazasynda «Memlekettik qyzmet» mýzeıiniń jańa formatta ashylýyna oraı «Urpaqtar sabaqtastyǵy» atty memlekettik qyzmet ardagerlerimen kezdesý ótti.
İs-sharany Almaty qalasy ákimi apparaty men QR Memlekettik qyzmet isteri agenttiginiń Almaty qalasy boıynsha departamenti birlesip uıymdastyrdy. Kezdesýge Almaty qalasy ákimi apparaty basshysynyń orynbasary B. Qabdol, QR Memlekettik qyzmet isteri agenttiginiń Almaty qalasy boıynsha departamentiniń basshysy Sh. Álimhan, “Tálimgerler keńesiniń” músheleri, memlekettik qyzmet ardagerleri, úzdik memlekettik qyzmetkerler men kýrs tyńdaýshylary qatysty.
«Memlekettik qyzmet» mýzeıin qurý bastamasy Qazaqstan Respýblıkasy Memlekettik qyzmet isteri agenttigi tóraǵasynyń memlekettik qyzmetshiniń oń beınesin qalyptastyrý jónindegi 2023-2025 jyldarǵa arnalǵan is-sharalar josparyna negizdelgen. Mýzeıdiń maqsaty – memlekettik qyzmettiń tarıhy men jetistikterin nasıhattaý, tarıhı qujattar men mańyzdy oqıǵalardy kórsetý arqyly memlekettik qyzmettiń oń ımıjin qalyptastyrý. Sonymen qatar, keıingi urpaqqa memlekettik qyzmettiń muralaryn jetkize otyryp, urpaqtar arasyndaǵy sabaqtastyqty qamtamasyz etý.
Kezdesýge qatysqan memlekettik qyzmet ardagerleri mýzeı jumysyna qatysty pikirlerin bildirip, ony damytý men jádigerlermen tolyqtyrý jóninde óz usynystaryn aıtty.
Fılıal dırektory Aıgerim Abılova mýzeıdiń bolashaǵyna toqtala otyryp:
«Memlekettik qyzmet» mýzeıi aldaǵy ýaqytta fılıal bazasynda bilim alýshy jastar men stýdentter úshin memlekettik qyzmettiń damý kezeńderin tanystyryp, ardagerlerdiń qatysýymen motıvasıalyq ortalyqqa aınalady», – dedi.
Jańa formattaǵy mýzeı memlekettik qyzmetti damytý men urpaqtar sabaqtastyǵyn nasıhattaýdyń mańyzdy alańyna aınalmaq.