Qazaqstanda kóshi-qon zańnamasyn buzýshylardy elden shyǵarý týraly 476 sot sheshimi shyǵaryldy.
QR İshki ister mınıstrligi eldegi kóshi-qon zańnamasynyń saqtalýyn tekserip, jedel-aldyn alý sharasyn ótkizdi, dep habarlaıdy Almaty-akshamy.kz QazAqparatqa silteme jasap.
«Kóshi-qon zańnamasyn buzýshylardy elden shyǵarý týraly 476 sot sheshimi shyǵaryldy. Májbúrli túrde 70 sheteldik eline qaıtaryldy. Barlyq shyǵarylǵan adamdarǵa 5 jyl boıy Qazaqstanǵa kirýge tyıym salynady», - dedi İshki ister mınıstrligi baspasóz qyzmetiniń ókili Shuǵyla Turlybek aptalyq brıfıńte.
Máselen Almaty oblysynyń polısıasy Qonaev qalasynda orta mektep salý kezinde zańsyz eńbek etken Afrıka elderiniń 11 azamatyn anyqtady. Elde bolý merzimderin buzǵan barlyq sheteldik jaýapkershilikke tartyldy jáne olardy deportasıalaý boıynsha sharalar qabyldanýda.
İİM elimizde sheteldikterdi qabyldaýshy tarapqa ózderine kelgen sheteldik týraly İshki ister organdaryn habardar etýge tıis ekendigin taǵy da eskertedi.
Qoldanystaǵy zańnamaǵa sáıkes, osy mehanızm buzylǵan jaǵdaıda qabyldaýshy tarap QR ÁQBtK 518-baby boıynsha ákimshilik jaýapqa tartylady. Onda jeke tulǵalarǵa eskertý jasalsa, laýazymdy tulǵalarǵa, shaǵyn kásipkerlik sýbektilerine nemese komersıalyq emes uıymdarǵa 10 AEK (1 AEK - 3450 teńge) mólsherinde aıyppul salynady.
«Osyǵan baılanysty, kóshi-qon qyzmeti Qazaqstanda sheteldikterdi qabyldaıtyn adamdarǵa ózderinde turatyn adamdar týraly polısıaǵa habarlaý normalaryn buzbaýǵa shaqyrady», - dedi Shuǵyla Turlybek.