Almaty qalasy boıynsha Ekonomıkalyq tergeýler departamentiniń qyzmetkerleri jastar saıasaty basqarmasymen birlese otyryp, 9–11 synyp oqýshylaryna arnalǵan qarjylyq qaýipsizdik boıynsha dárister sıklin ótkizip jatyr, - dep habarlaıdy Aqshamnews.kz tilshisi.
Aǵymdaǵy jyldyń 25 qyrkúıeginde Almaty qalasy Naýryzbaı aýdanyndaǵy № 207 mektep lıseıinde joǵary synyp oqýshylaryna arnalǵan dáris ótti. İs-shara «Zań jáne tártip» qaǵıdatyn iske asyrý aıasynda uıymdastyrylyp, óskeleń urpaqtyń quqyqtyq saýattylyǵyn arttyrýǵa, jastardyń qarjylyq máselelerge jaýapty qaraý daǵdylaryn qalyptastyrýǵa, sondaı-aq zańsyz sqemelerge tartýdyń aldyn alýǵa baǵyttalǵan.
Dárister barysynda joǵary synyp oqýshylary ınternet-alaıaqtyqty qalaı anyqtaý jáne onyń qurbany bolmaý joldary týraly praktıkalyq bilim alady.
Oqýshylarǵa «dropperlerdiń» kim ekeni, qarjylyq pıramıdalardyń qalaı jumys isteıtini túsindirilip, kúmándi siltemeler men saıttardy tekserýdiń qarapaıym ári qoljetimdi tásilderi kórsetiledi.
Erekshe kóńil jasóspirimderdiń «ınternet-alaıaqtarǵa» qarsy turý daǵdylaryn qalyptastyrýǵa jáne sıfrlyq ortada synı oılaýyn damytýǵa bólinedi.
Jańa oqý jylynyń basynan beri Almaty qalasy boıynsha DER qyzmetkerleri qaladaǵy JOO-larda, kolejderde jáne mektepterde kezdesýler ótkizip, 1000-nan astam tyńdaýshylardy qamtydy. Dárister oqýshylar men pedagogtardyń jandy qyzyǵýshylyǵyn týǵyzyp, alynǵan aqparattyń praktıkalyq mańyzdylyǵy atalyp ótti.
Mundaı is-sharalardy ótkizý jumysy qalanyń barlyq aýdandarynda jalǵasyn tabady, osylaısha almatylyq jastardyń kóbirek bóligi qaýipsiz ári sanaly qarjylyq minez-qulyqqa qajetti bilim alady.