Atalǵan jaǵdaıdan soń bıologıa pániniń muǵalimi óz erkimen jumystan ketti
Almaty polısıasy sabaq ústinde teńiz shoshqasyn uryp óltirip, ony oqýshylarǵa soıyp kórsetý deregi boıynsha qylmystyq is qozǵady. Bul týraly qalalyq polısıa departamenti málim etti, dep habarlaıdy Almaty-akshamy.kz.
Habar 24 arnasynyń habarlaýynsha, atalǵan jaǵdaı Almatydaǵy «125 ALMATY» jeke mektebinde bolǵan. Bıologıa páni muǵaliminiń tájirıbelik maqsatta teńiz shoshqasyn uryp, ony soıyp jatqan beınejazbasy áleýmettik jelide tarady. Bilim salasynda sapany qamtamasyz etý departamenti men qalalyq bilim basqarmasynyń mamandary atalǵan bilim mekemesine baryp, mán-jáıdy anyqtaǵan.
"Muǵalimniń aıtýynsha, ol oqýshylardyń ótinishi boıynsha anatomıa men fızıologıa bólimin túsindirý úshin teńiz shoshqasyn múshelep kórsetken", - deıdi bilim basqarmasynyń ókili.
«Mektep ujymyna aldaǵy ýaqytta mundaı jaǵdaıdy boldyrmaý týraly túsindirý jumystary júrgizildi. Sondaı-aq mektep ishinde baqylaýdy kúsheıtý boıynsha usynystar berildi. Qorshaǵan ortany saqtaý men janýarlarǵa qatygezdik kórsetýdiń aldyn alý týraly tárbıelik jumystar júrgizý qajettigi aıtyldy. Atalǵan jaǵdaıdan soń bıologıa pániniń muǵalimi óz erkimen jumystan ketti», - dedi qalalyq bilim basqarmasynyń jalpy orta bilim berý bóliminiń basshysy Aqmaral Aıtýarova.