Búgin, 27 qańtar 2025 jyly, Almatydaǵy 28 gvardıashy-panfılovshylar saıabaǵynda Lenıngradtyń qorshaýdan bosaǵanyna 81 jyl tolýyna oraı eske alý mıtıńi ótti, dep habarlaıdy aqshamnews.kz.
1941 jyldyń 8 qyrkúıeginen 1944 jyldyń 27 qańtaryna deıin 872 kúnge sozylǵan bul blokada – Uly Otan soǵysy tarıhyndaǵy eń aýyr gýmanıtarlyq apattardyń biri. Qorshaý kezinde mıllıondaǵan beıbit turǵyn men qalanyń qorǵaýshylary qaza tapty. Bul oqıǵa adamzattyń qaısarlyǵy men rýhynyń synalýynyń sımvoly retinde tarıhta máńgi saqtalady.
Sharaǵa qalanyń segiz aýdanynyń ardagerler keńesteriniń ókilderi, Reseı Federasıasynyń Bas konsýldyǵy, Aýǵan soǵysynyń ardagerleri, qoǵamdyq uıymdar men partıalardyń ókilderi qatysty. Olar Lenıngradty qorǵaý jolynda qaza tapqan beıbit turǵyndar men jaýyngerlerdi bir mınýt únsizdikpen eske aldy.
Almatyda «Lenıngrad blokadashylarynyń qalalyq uıymy» qoǵamdyq birlestigi jumys isteıdi. Bul uıymǵa sol bir aýyr kezeńde Lenıngradtan aman qalǵan burynǵy turǵyndar múshelik etedi. Uıymnyń jetekshisi Marına Nıkolaevna Sergıeva – qorshaý kezinde «Ómir joly» arqyly Ladoga kóliniń ústimen Qazaqstanǵa evakýasıalanǵandardyń biri. Ol óziniń balalyq shaqtaǵy estelikterimen bólisti. Bombalaý, úreı jáne uzaq joldaǵy qıyndyqtarǵa qaramastan, anasynyń qaısarlyǵy arqasynda Marına Nıkolaevna otbasymen birge aman qalǵan.
Búginde Marına Nıkolaevna óziniń jasyna qaramastan, qoǵamdyq-saıası belsendiligin jalǵastyryp, el Prezıdentiniń saıasatyn qoldaý, turaqtylyqty saqtaý jáne jastardy patrıottyq rýhta tárbıeleý baǵytynda jumystar atqarýda. Ol qoǵamnyń beıbitshiligi men birligine erekshe mán beredi jáne bul qundylyqtardy urpaqtan urpaqqa jetkizýdi óz mindeti dep sanaıdy.
Shara barysynda 28 gvardıashy-panfılovshylar saıabaǵynda jınalǵandar estelik gúl shoqtaryn qoıyp, qorshaý qurbandaryn eske aldy. Bul kún – adamzat tarıhyndaǵy eń aýyr, biraq batyrlyqqa toly oqıǵalardyń biri retinde jadymyzda qalmaq.