Almatyda «Avrora kýbogy» jáne «Kóshpendiler dalasy» atty barlyq ıt tuqymdary qatysatyn eki kórme ótip jatyr. İs-sharany «Avrora» kınologıalyq klýby uıymdastyryp otyr.
Halyqaralyq kórmege Qazaqstan, Ózbekstan, Qyrǵyzstan jáne Reseıden barlyǵy 500-den astam ıt qatysýda. Elýden astam ıt tuqymy Qazaqstan chempıony jáne Halyqaralyq ásemdik chempıony ataqtaryn sarapqa salady. Oǵan Nıderland, Slovakıa, Grekıa jáne Qytaıdan kelgen halyqaralyq sarapshylar tórelik etedi.
- Almaty qalasynda ulttyq kórme, halyqaralyq kórme jáne monotuqymdy tazyǵa arnalǵan arnaıy kórme ótip jatyr. Monotuqymdy kórmege 30-dan astam tazy qatysyp otyr. Bul tarıhı oqıǵa. Sebebi tazyny álemdik deńgeıde moıyndaǵanǵa deıin bizdiń ıtterimiz moıyndalmaǵan toptyń ishinde óner kórsetetin. Búgin ózine uqsas moıyndalǵa ıtterdiń arasynda saıysqa túsedi. Tóreshiler ıtterdiń, onyń ishinde tazynyń da boıyn, bıiktigin, júni men quıryǵyn, súıekteriniń durys bolýyn, tisterin jáne minezin tekseredi. Jeńimpaz bolǵan ıtti baqylaýǵa alyp, onyń genetıkasyn saqtaýǵa jumys isteımiz, - dedi Qazaqstan kınologtar odaǵynyń prezıdenti Baýyrjan Serikqalı
Aıta ketken jón, bıyl 3 qyrkúıekte Halyqaralyq kınologıalyq federasıa (FCI) qazaq tazysyn resmı túrde ádepki taný týraly sheshim shyǵaryp, Qazaqstanǵa osy tuqym standartynyń ıesi mártebesin berdi. Bul jetistikke QR Prezıdenti İs basqarmasynyń qamqorlyǵymen Qazaqstan kınologtary odaǵynyń qajyrly eńbeginiń jáne kúsh-jigeriniń, sondaı-aq biregeı tuqymdy saqtaýǵa, damytýǵa jáne tanymal etýge orasan zor úles qosqan kóptegen kınologtardyń, seleksıonerlerdiń, ıtbegiler men áýesqoı azamattardyń arqasynda qol jetkizildi. 
Itter kórmesi qarsańynda «Avrora» kınologıalyq klýby Marwin shyǵarmashylyq áleminiń qoldaýymen 6-15 jas aralyǵyndaǵy balalar qatysqan «Kóshpendi jáne ıt» sýretshiler baıqaýyn ótkizdi. Qatysýshylardyń barlyq týyndylary 28 jáne 29 qyrkúıektegi kórmede jurtshylyq nazaryna usynylyp, jeńimpazdar ıtter kórmesiniń ashylýy qarsańynda marapattaldy.