16 tamyzda Almatyda Qazaqstan halqy Assambleıasynyń 30 jyldyǵyna oraı MEGA Alma-Ata saýda-oıyn-saýyq ortalyǵynda dástúrli Koreı mádenıetiniń kúni uıymdastyryldy. Bul mereke bıyl 36-shy ret ótip otyr. Sharaǵa 5 myńnan asa qonaq jınalyp, qalanyń eń jarqyn mádenı oqıǵalarynyń birine aınaldy.
Qonaqtarǵa alǵashqy bolyp quttyqtaý sózin Almaty qalalyq máslıhatynyń depýtaty, «Shın-Laın» kompanıalar tobynyń prezıdenti, «Almaty Koreı ulttyq ortalyǵy» QB tóraǵasy Andreı Antonovıch Shın joldady. Ol Koreı mádenıetiniń kúni alǵash ret 1989 jyly ótkenin jáne sodan beri jyl saıyn almatylyqtar men qala qonaqtaryn biriktirip, Koreı halqynyń tarıhyna, óneri men dástúrlerine qurmet kórsetýge sebepshi bolyp kele jatqanyn atap ótti.
Qazaqstan halqy Assambleıasynyń etnomádenı birlestigi bolyp sanalatyn Almaty Koreı ulttyq ortalyǵy búginde 1200-den asa músheni jáne 31 qurylymdyq bólimsheni biriktiredi. Ortalyq ár jyly ótetin bul sharaǵa almatylyqtar men qala qonaqtaryn shaqyryp, ultaralyq tatýlyqty nyǵaıtýǵa, mádenıetaralyq dıalogty damytýǵa jáne Koreı mádenıetin nasıhattaýǵa úles qosyp keledi.
Koreı mádenıetiniń kúni – Koreı etnosynyń baı dástúrin, tilin jáne biregeıligin jas urpaqqa jetkizýge arnalǵan jarqyn mereke. Bul shara túrli ult ókilderi arasyndaǵy syılastyq pen birlikti nyǵaıtýǵa úlken yqpal etedi.
Mereke aıasynda Almaty Koreı ulttyq ortalyǵynyń shyǵarmashylyq ujymdary, Ońtústik Koreıanyń «Teoýllım» teatrynyń ártisteri men Koreıa Respýblıkasynyń «Chongsong Arırang» mádenı qorynyń ónerpazdary ulttyq bı, áýen jáne konserttik baǵdarlamasyn usyndy.
Saltanatty sharaǵa memlekettik jáne dıplomatıalyq organdardyń ókilderi, Koreıa Respýblıkasynyń Almatydaǵy Bas konsýly jáne Kanvondo provınsıasynyń gýbernatory qurmetti qonaq retinde qatysty.
Kelýshiler Qazaqstandaǵy Koreı halqynyń tarıhymen jáne mádenı murasymen jaqynyraq tanysýǵa múmkindik aldy.
Koreı mádenıetiniń kúni taǵy da eldegi halyqtar arasyndaǵy dostyqty, ózara túsinistik pen mádenı baılanysty nyǵaıtýdyń mańyzdy alańy ekenin dáleldedi.