Baspana alýǵa arnalǵan ońtaıly baǵdarlamalar
Qala kúni 227 kópbalaly otbasy «Nurly jer» turǵyn úı baǵdarlamasy boıynsha salynǵan «Alma Sıtı-5» turǵyn úı kesheniniń jańa páterlerine qonys aýdardy, dep habarlaıdy Almaty-akshamy.kz.
Qalalyq turǵyn úı saıasaty basqarmasy basshysynyń orynbasary Ermek Ámirov Óńirlik komýnıkasıalar qyzmetinde ótken brıfıńte qoljetimdi turǵyn úımen qamtamasyz etý sharalary týraly aıtty. "Otbasy Bank" arqyly júzege asatyn «Baqytty otbasy» baǵdarlamasynyń kómegimen qoljetimdi turǵyn úı alýǵa bolady.
«Bul baǵdarlamanyń kómegimen kóp balaly jáne tolyq emes otbasylar, sondaı-aq múmkindigi shekteýli balalardy tárbıelep otyrǵan otbasylar naryqta bastapqy nemese qosalqy turǵyn úıdi qolaıly sharttarmen ala alady. Baǵdarlamany 3 jyldyń ishinde 634 almatylyq otbasy qoldandy», - dedi E.Ámirov.
Turǵyndardyń áleýmettik osal toby sanatynda kezekte turǵandar úshin úlken kómek – qaıtarymsyz turǵyn úı sertıfıkattaryn alý múmkindigi. Bul soma "Otbasy Bankten" jeńildikpen ıpoteka alý úshin bastapqy tólemniń bir bóligin jabý úshin kózdelgen.
Sertıfıkatty kezekte turǵan I jáne II toptaǵy múgedekter, múgedek balalary bar nemese tárbıelep otyrǵan otbasylar, jetim balalar, ata-anasynyń qamqorynsyz qalǵan balalar jáne kóp balaly otbasylar ala alady. Almaty ákimdigi 1 mıllıon teńge somasyna 2 000 qaıtarymsyz turǵyn úı sertıfıkatyn berýge jergilikti búdjetten 2 mıllıard teńge bóldi.
Jumys isteıtin jastar «Almaty jastary» qalalyq baǵdarlamasyna qatysa alady. Onyń aıasynda 1 000 jas otbasy baspanamen qamtamasyz etildi.
«Bıyl biz taǵy 1 000 jas otbasyn qamtýdy josparlap otyrmyz. Qazirgi tańda olardyń 772-si baspanaly boldy», - dep tolyqtyrdy E. Ámirov.
Sonymen qatar jumys isteıtin 1 050 jasty 5 jyl merzimge jalǵa beriletin turǵyn úımen qamtamasyz etý josparlanyp otyr. Sóz sońynda turǵyn úı saıasaty basqarmasy basshysynyń orynbasary Almaty qalasy ákimdiginiń azamattardy turǵyn úımen qamtamasyz etý qarqynyn arttyratynyn aıtty.
Aıta keterligi, Qala kúni merekesi bes jyldan beri baspana kezeginde turǵan kóp balaly ana Qorlan Qadyrqulova úshin eki ese mańyzdy boldy. Buryn otbasy jaldamaly páterde turatyn, endi olar memleketten jaldamaly turǵyn úı baǵdarlamasy boıynsha alynǵan úsh bólmeli keń páterde turady. Sol tizimge megapolıstiń eki mıllıonynshy turǵyny Aıala Jambyldyń otbasy da endi.