Qyzyqty oqıǵalar men kútpegen sátterge toly kıno qoǵamdaǵy ózekti máselelerdi qozǵaıdy.
Alǵashqy kórsetilimge elimizge belgili óner juldyzdary jınaldy, dep habarlaıdy aqshamnews.kz.
Qyzyl kilemde – juldyzdar, súıikti akterlaryn asyǵa kútken kórermen. «Qolyńnan kelse, alyp qash» fılminiń alǵashqy kórsetilimine asyqqandar kóp. Otbasylyq komedıa 35 jastaǵy yrymshyl Samal jáne onyń turmys qurýdaǵy maqsaty jaıly.
Al Samaldyń ómirlik jaryn tabýǵa qurbylary kómektesedi. Kıno týyndynyń qyzǵan shaǵy da osy sátten bastalady. Fılmde Zarına Karmen, Aısholpan Baıtúgel, Qanat Tasqan, Jansaıa Muratbekqyzy syndy akterlar basty róldi somdaıdy.
Aısholpan Baıtúgel, aktrısa:
Meniń sahnalarym óte aýyr boldy. Imıtasıa jasamadym. Barlyǵyn ózim jasadym. Kólikti urǵan sátter bolady. Qolym, tobyǵym isip ketedi. Qulap qalamyn. Sol sátte qatty jylaǵanymmen, qazir qyzyqty sát bolyp este qaldy.
Fılm 25 kúnde taspalandy. Túsirilimge Almaty oblysy Jambyl aýdanyndaǵy Degeres aýyly men Almaty qalasy tańdalǵan.
Azamat Rzaǵalıev, kreatıvti prodúser:
Munda qoǵamdaǵy kóp másele, onyń ishinde ajyrasý jaıy kóterildi. Ár áıel óziniń baqytyn tabýǵa tıis degen oıdy jetkizgimiz keldi.
Otandyq komedıa elimizdiń barlyq kınoteatrynda kórsetiledi.