Almatydaǵy «Alataý» dástúrli óner teatry alǵash ret kúrdeli jóndeýden ótýde.
Ǵımarat ashylǵaly beri mundaı aýqymdy jańartý qolǵa alynǵan emes. Jóndeý jumystary qasbetti, kınozaldy, eden jabyny men oryndyqtardy, sondaı-aq ǵımarat aınalasyn qamtıdy, dep habarlaıdy aqshamnews.kz.
Erekshe nazar az qozǵala alatyn azamattarǵa qolaıly jaǵdaı jasaýǵa bólingen. Júrgizilip jatqan jumystar kórermenge de, shyǵarmashylyq ujymǵa da barynsha jaıly orta qalyptastyrýǵa baǵyttalǵan. Mańyzdysy – teatrdyń zamanaýı ári qolaıly bolýy.
Nysandy Almaty máslıhatynyń depýtattary baryp kórdi. Delegasıaǵa mádenıet, sport, ishki saıasat, din jáne jastar isi jónindegi komısıa tóraıymy Dıana Erlan jetekshilik etti. Depýtattar qaladaǵy teatr ujymdarynyń respýblıkalyq jáne halyqaralyq deńgeıde jetistikterge jetip júrgenin atap ótti. Sondaı-aq olar «Alataý» teatrynyń 10 jyldyq mereıtoıyn jańarǵan, zamanaýı kelbetimen qarsy alýy qajettigin erekshe aıtty.
Kúrdeli jóndeýdi osy jyldyń sońyna deıin aıaqtaý josparlanǵan.