Ónimderdi 300-den astam aýyl sharýashylyǵy taýar óndirýshileri usynady
Almatyda qoljetimdi baǵada jańa ári balǵyn ónimder alýǵa bolatyn taǵy bir oryn ashylady, dep habarlaıdy aqshamnews.kz.
Jetisý aýdanynda «demalys kúngi jármeńke» jumysyn bastaıtynyn «Almaty» áleýmettik-kásipkerlik korporasıasy habarlady.
Jármeńkeniń maqsaty – jergilikti sharýalarǵa óz ónimderin ótkizýge múmkindik jasaý, al turǵyndarǵa áleýmettik mańyzy bar azyq-túlikti qoljetimdi baǵamen usyný.
Aldaǵy demalys kúnderi Qulager yqshamaýdanyndaǵy «Gúlder» saıabaǵynyń aldynda 15 saýda jasaıtyn shatyrlar qoıylady. Munda jylqy, sıyr, qoı jáne qus eti, sút ónimderi, jumyrtqa, kókónis pen jemis-jıdek, sondaı-aq jańa pisken nan-toqash ónimderi satylady. Saýda alańy demalys kúnderi saǵat 09:00-den 18:00-ge deıin jumys isteıdi.
Qazir demalys kúngi jármeńkeler Almatynyń birneshe aýdanynda turaqty túrde ótedi:
- Almaly aýdany – Masanchı kóshesi (Áıteke bı – Gogol kósheleriniń arasy);
- Áýezov aýdany – Ótegen batyr kóshesi (Abaı dańǵylynan tómen);
- Bostandyq aýdany – Qazaqfılm yqshamaýdany (ál-Farabı dańǵylynan joǵary);
- Medeý aýdany – Meńdiqulov býlvary – Bekturov kóshesi.
Apta saıyn jármeńkelerge 45 myńnan astam qala turǵyny keledi. Ónimderdi Almaty men Almaty oblysynyń 300-den astam aýyl sharýashylyǵy taýar óndirýshileri usynady. Saýda sórelerinde 1000-nan astam taýar túri bar: et, jumyrtqa, kókónis, jemis-jıdek, sút ónimderi, shujyq, bal jáne taǵy basqasy.
Baǵany turaqtandyrý sharalary aıasynda áleýmettik mańyzy bar azyq-túlikter naryqtaǵydan 15–20 paıyz tómen baǵamen satylady.