Aýqymdy basqosý eki kúnge sozylady. İs-sharanyń birinshi kúni saptyq baıqaýdan bastaldy.
Kóliktegi polısıa departamentiniń bastyǵy Ońal Bekeevtiń tóraǵalyǵymen QR İİM M. Esbolatov atyndaǵy Almaty akademıasy bazasynda departamenttiń aýmaqtyq bólinisteriniń basshy quramyna oqý-ádistemelik jıyn ótkizilýde, dep habarlaıdy Almaty-akshamy.kz Polisia.kz-ke silteme jasap.
Basqosý barysynda Ońal Bekeev búgingi kúni ishki ister organdary qyzmetkerlerine júktelgen basym mindetterge erekshe nazar aýdardy. Ol óz sózinde El Prezıdenti Q. Toqaevtyń tikeleı tapsyrmasymen jáne İshki ister mınıstri M. Ahmetjanovtyń qadaǵalap, iske asyrylýyna muryndyq bolýymen aýqymdy jobalar júzege asyrylyp jatqandyǵyna toqtaldy.
"Aldaǵy ýaqytta da polıseılerdiń negizgi mindetteri ózgerissiz qalady: halyqqa adal qyzmet etý, azamattardyń quqyǵyn qorǵaý jáne qoǵamdyq tártipti múltiksiz qamtamasyz etý. Jurtqa jaqyn polısıa degenimiz – oqys jaǵdaıǵa tap bolǵan azamattarǵa kez kelgen ýaqytta, kez kelgen jerde der kezinde kómekke kele alatyn polısıa. Jańa qazaqstannyń polısıasy zaman talabyna saı mindetterdi sheshýge, konstıtýsıalyq tártipti saqtaýda bekem bolýlary tıis", – dedi kólik polısıasynyń basshysy.
Polısıanyń servıstik jumys úlgisine kóshýi osy maqsatta júzege asyrylyp jatyr. Osy baǵytta jeke quramǵa İİM-niń talaptary jetkizilip, zańdylyq pen tártipti saqtaý jóninde qosymsha nusqaýlar berildi. Budan soń jıynǵa qatysýshylar İİM M. Esbolatov atyndaǵy Almaty akademıasynyń basshylyǵymen kezdesip, bilim berý mekemesiniń búgingi tynysymen tanysty.
Sondaı-aq, akademıanyń túlekterimen de arnaıy júzdesip, olardyń ishki ister organdaryna, sonyń ishinde kólik polısıasyna qyzmetke ornalasý týraly pikirleri tyńdaldy. Talaı jyldan beri ishki ister organdarynda eńbek etip kele jatqan bilikti mamandar bolashaq ofıserlerge qyzmettiń qyr-syry týraly jan-jaqty áńgimelep, olardyń suraqtaryna jaýap berdi.
İs-shara sheńberinde óńirlerden kelgen departament bólinisteriniń basshylyq quramyna jaýapty vedomstvanyń ókilderimen birlesip, qaýipsizdikti qamtamasyz etýdegi polısıa jumysynyń servıstik modeli, tobyr psıhologıasy: daǵdarysty basqarý, sybaılas jemqorlyqtyń aldyn alý, İİO qyzmetkerleri úshin kópshilik aldynda sóz sóıleý tehnıkasy taqyryptarynda keńeıtilgen semınar-trenıngter uıymdastyryldy.