Bul týraly Almaty ákimi Erbolat Dosaev jumys sapary aıasynda halyqpen kezdesýde málimdedi.
Ol Almaty qalasynyń Alataý aýdanynda ınjenerlik jelilerdi damytý boıynsha jobalar jalǵasyp jatqanyn atap ótti, dep habarlaıdy Almaty-akshamy.kz
2018-2020 jyldary Kókqaınar shaǵyn aýdanynda sýmen jabdyqtaý jáne káriz jelilerin salý boıynsha jumystar júrgizildi. Aýdannyń damýymen ınjenerlik komýnıkasıalar jelilerin keńeıtý qajettiligi týyndady.
Buryn ınjenerlik jelilerge qosylmaǵan jáne 400-den astam adam turatyn 80 úı sýmen jáne kárizben qamtylatyn bolady. Uzyndyǵy 3 km jeliler Aqbastaý, Besaǵash, Arqalyq, Kókqaınar, Aqshaǵyl jáne Mambetov kóshelerimen ótedi.
Osylaısha, Kókqaınar shaǵyn aýdany sý qubyry men káriz jelilerimen tolyq qamtamasyz etiledi.
Atalǵan ýchaskede taratý jelilerin salý aǵymdaǵy jylǵa josparlanǵan. Qazir joba memlekettik saraptamadan ótýde.
Eske salsaq, Almatynyń Alataý aýdanyndaǵy 11 shaǵyn aýdanynda ınjenerlik jelilerdi damytý aıasynda bıyl aıtarlyqtaı jobalar josparlanǵan.