Qazaqstan men Ońtústik Koreıanyń dıplomatıalyq qarym-qatynasynyń 30 jyldyǵyna oraı, Koreıa halyqaralyq mádenı almasý agenttigi men koreılik qarjy toby - «Shinhan Card» kompanıasymen birlesip Qazaqstandaǵy «KIMEP» ýnıversıtetinde shaǵyn koreı kitaphanasyn ashty, dep habarlaıdy Almaty-akshamy.kz.
Bul mádenı jáne bilim jobasy eki eldiń arasyndaǵy dıplomatıalyq qarym-qatynastyń 30 jyldyǵyna baılanysty uıymdastyrylyp otyr. Ýnıversıtet qabyrǵasynda kitaphananyń ashylýy saltanatty túrde ótti.
Eki uıym KIMEP ýnıversıtetindegi kitaphanaǵa arnalǵan oryndy jóndep, kitap turatyn jańa shkaf, jańa ústel jáne oryndyqtarmen qamtamasyz etti. Kitaphana ishi koreılik dızaınmen jasalǵan. Koreı ádebıetiniń aýdarmalary, koreı tilin úırenýge arnalǵan kitaptardy syıǵa tartty. Syıǵa tarqan kitap sany 1500 dana. Aldaǵy ýaqytty jańa koreılik kitaphana jastardyń ıgiligine jumys jasaıdy. Kitaphanaǵa koreı tilinde «arym ın» degen at berildi. Maǵynasy «ádemi adam» degen sóz. Iaǵnı, kitap oqyǵan adamdar rýhanı ádemi jandar degen sóz. Kitaphana ishindegi kitaptar aǵylshyn jáne koreı tilinde basylyp shyqqan kitaptar. Barlyǵy derlik sońǵy kezde jaryq kórgen jańa kitaptar. Mysaly, atap aıtsaq, koreı tarıhy, mádenıeti, óneri, tili jáne sońǵy álemdik «hallú fenomeni» degen atpen kópshilikke jaqyn tanys «K-POP» jáne «K-Drama» týraly kitaptar da bar. Stýdentter aǵylshyn jáne koreı tilindegi osy kitaptardy oqı alady. Sonymen qatar, bolashaqta jınalyp, aýmaǵy shaǵyn kitaphana ishinde túrli mádenı sharalar men kezdesýler de ótkize alady. «Kitap maǵan taqtan da qymbat» dep Ýılám Shekspır aıtpaqshy, kitaphanadaǵy árbir baǵaly kitap stýdentterge paıdaly aqparat beredi dep úmittenemiz.
Ashylý saltanatynda quttyqtaý sóz sóılegen dırektor Chon Gıl-Hva: «Kitaphananyń ashylýy – KIMEP ýnıversıtetindegi kórnekti jas talanttar úshin bolashaqqa baǵyttalǵan ınvestısıa», - dedi.
Odan basqa «Shinhan Card»-tyń bas dırektor Dong-Gvon Mýn myrza, KIMEP ýnıversıtetiniń prezıdenti doktor Chan Ian Beng myrza jáne birqatar qurmetti qonaqtar sóz sóıledi.
Qazirgi kezde Qazaqstan aýmaǵynda 120 000-ǵa jýyq jergilikti kárister turady. Qazaqstannyń 14 ýnıversıteti, mádenı jáne oqý ortalyqtarynda koreı tili úıretiledi. Qazaqstan koreı tili boıynsha TMD elderi arasynda Reseıden keıingi ekinshi orynda.
Atap aıtqanda, koreılik doktor Chan Ian Beng qurǵan KIMEP ýnıversıteti Qazaqstandaǵy amerıkandyq úlgidegi oqý júıesi men aǵylshyn tilinde bilim berýdi engizgen alǵashqy ýnıversıtet. Sonymen qatar Ortalyq Azıadaǵy eń úzdik oqý oryndarynyń biri bolyp sanalady. Prezıdenti Chan Ian Beng myrza da káris ultynyń ókili. Osy joly atalmysh oqý ornynda koreı kitaphanasynyń ashylyp, kórnekti oqý ornynyń stýdentterine koreı mádenıetimen jaqynyraq tanysýǵa múmkindik jasaldy.
Ótken 2021 jyly memleket basshysy Qasym-Jomart Toqaevtyń Koreıa Respýblıkasyna memlekettik resmı sapary boldy. Sonymen qatar, prezıdent Seýl qalasyndaǵy belgili oqý oryndarynyń biriniń aýmaǵyna Abaı Qunanbaıulyna ornatylǵan bústiń resmı ashylýy rásimine qatysty. Osy sapar barysynda eki eldiń basshylary «Koreıa men Qazaqstan ózara mádenı almasý jylyn» jarıalady. Ol 2022 jyldan 2023 jylǵa deıin josparlanǵan. Sol sebepti 2022 jyldan bastap mádenı salada eki jylǵa arnalǵan «Koreıa men Qazaqstan ózara mádenı almasý jyly» jobasy josparly túrde júzege asyrylýda.
Bıylǵy jyly mádenı jobalar jyldyń sońyna deıin bes salada júrgiziledi. Mysaly, beınekontent óndirisi, jas sýretshiler, anımasıa, beıneleý óneri jáne dástúrli mádenıet. Beınekontentke keletin bolsaq, Koreıa ulttyq óner ýnıversıteti men Qazaqstan qoǵamdyq óner mektebiniń stýdentteri derekti fılmderdi birlesip túsirýde, al jas sýretshiler Koreıa teatrymen jáne ulttyq teatrymen iskerlik kelisimderdi alǵa jyljytýda.
Almaty men Ońtústik Koreıanyń Tegý qalasy – baýyrlas qalalar. Osydan 32 jyl buryn Azıanyń áıgili eki qalasy baılanys ornatyp, baýyrlastyq baılanys jónindegi kelisimge 1991 jyly qol qoıdy. Kórip otyrǵandaryńyzdaı, Almaty koreı eliniń qalalarymen de tarıhı baılanysy bar qala. Alataýdyń baýyryndaǵy osyndaı ádemi shaharda jańa kitaphananyń ashylýy Almatydaı qala jastary úshin óte mańyzdy jobanyń biri. Qalanyń bilim qýǵan jas turǵyndary bos ýaqytynda seriktes elderdiń mádenıetimen tanysa alady. Osy aıdyń 1-shi kúninen bastap stýdent jastar úshin ýnıversıtet qabyrǵasyndaǵy kitaphananyń esigi árdaıym ashyq.
Dastan Aqash shyǵystanýshy-koreıtanýshy, memlekettik basqarý men halyqaralyq qarym-qatynas mamany