Almatyda “Kıberpol” qyzmetkerleri jaldamaly alaıaqtardy ustady.
Anyqtalǵandaı, eki jas jigit alaıaqtardyń qylmystyq jolmen tapqan aqshasyn qolma-qol aqshaǵa aınaldyrýǵa kómektesken.
Aqshalaı syıaqy úshin olar ózderiniń bank kartalaryn jáne jeke mobıldi bank shottaryn qaskóılerge bergen, dep habarlaıdy aqshamnews.kz Polisia.kz-ke silteme jasap.
– Jábirlenýshilerdiń biri alaıaqtyq jolmen 20 mıllıon teńgeni joǵaltyp alǵan. Joǵaryda atalǵan kúdiktilerdiń kartochkalary arqyly alaıaqtar aqshaǵa aınaldyrǵan. Atalǵan derek boıynsha qylmystyq is tergelip jatyr. Eń aldymen jaldamaly alaıaqtar anyqtaldy jáne ustaldy. Olar qamaýǵa alyndy. Alaıaqtyqqa qatysqany úshin 5 jylǵa deıingi merzimge bas bostandyǵynan aıyrý túrindegi jaýapkershilik qarastyrylǵanyn atap ótkim keledi, – dedi, Almaty qalalyq PD krımınaldyq polısıa basqarmasynyń bastyǵy Maqsat Qanapáev.
Sonymen qatar Almaty polısıasy turǵyndarǵa qyraǵylyq pen saqtyq sharalaryn eske salady. Jeke nemese qarjylyq aqparatyńyzdy eshkimge aıtpańyz. Kúdikti qońyraýlarǵa jaýap bermeńiz jáne osyndaı derekter týraly dereý quqyq qorǵaý organdaryna habarlańyz. Paıdalaný úshin bank kartalaryn, derektemelerin, mobıldi bankıng qupıa sózderin úshinshi adamdarǵa bermeńiz. Eger siz aqshanyń qaıdan shyqqanyn jáne jiberýshini bilmeseńiz, bank kartasyna aqshany qabyldamańyz.