Almaty ákimi Erbolat Dosaevtyń tapsyrmasymen kezekte turǵan kópbalaly otbasylarǵa jáne halyqtyń áleýmettik jaǵynan osal tobynyń ókilderine Túrksib aýdany Qonaev atyndaǵy tutyný kooperatıvinde («Jas Qanat» sh/a.) jaldamaly páterler beriledi, dep habarlaıdy almaty-akshamy.kz
Aýdany 60 sharshy metrden 85 sharshy metrge deıingi jańa páterlerdiń kiltin turǵyn úı kezeginde turǵan 46 kópbalaly otbasy aldy. İs-sharaǵa Komýnaldyq ınfraqurylymdyq damytý basqarmasy, Qurylys basqarmasy, sonymen qatar, merdiger uıymnyń ókilderi qatysty.
Almaty qalasy Komýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly aýmaqty abattandyrý jumystary aıaqtalǵan bette kezekte turǵandarǵa beriletinin atap ótti. «Almaty ákimdigi turǵyn úı kesheninde damyǵan ınfraqurylymdy qurýǵa den qoıady. Munda sport jáne balalar alańdary jabdyqtalǵan, mektep bar, jańa balabaqsha salynyp jatyr, kelesi jyly turǵyndardyń demaly men bos ýaqytyn paıdaly ótkizýge arnalǵan oryndar boı kóteredi», - dedi ol.
Barlyǵy «Jas Qanat» shaǵyn aýdanynda kezekte turǵandarǵa 401 jaldamaly páter berý josparlanǵan bolatyn. Úı kezeń-kezeńimen beriledi. Birinshi kezeń turǵyndarǵa yńǵaıly kez - jańa oqý jyly qarsańynda – tamyzdyń sońynda bastaldy. Ekinshi kezeń qyrkúıekte bastaldy. Barlyǵy 300-den astam otbasy qonystandy.
Aıta keteıik, Qonaev atyndaǵy TK-degi úılerdiń qurylysy 2021 jyly qoldanysta bolǵan «Nurly jer» turǵyn úı-kommýnaldyq damýynyń 2020-2025 jyldarǵa arnalǵan memlekettik baǵdarlamasy aıasynda bastalǵan.