Keýde qýysy deformasıasyn emdeýdiń ádis-tásilderi týraly Almaty qalasynyń ÓKQ alańynda Almaty qalasy Qoǵamdyq densaýlyq saqtaý basqarmasynyń №1 qalalyq klınıkalyq aýrýhanasynyń keýde bóliginiń hırýrgıasy ortalyǵynyń meńgerýshisi Nurlan Jarylqapov aıtty, - dep habarlaıdy almaty-akshamy.kz
«Keýde qýysynyń deformasıasy adamdardyń 2 %-de kezdesedi. Súıek jáne shemirshek tinderindegi ózgerister keýde qýysynyń tirek fýnksıasyn da, qozǵalǵyshtyǵynyń qajetti mólsherin de tómendetedi. Keýde qýysynyń deformasıasy (tós jáne qabyrǵalar) tek kosmetıkalyq aqaý bolyp qana qoımaıdy jáne psıhologıalyq problemalardy ǵana emes, sonymen qatar keýde músheleriniń dısfýnksıasyna ákeledi. Bul patologıada tynys alýǵa baılanysty problemalar jıi týyndaıdy, qatty deformasıa kezinde júrek yǵysýy, ári onyń jumysyn buzylýy múmkin. Sondaı-aq, aýyr jaǵdaıdaǵy keýde deformasıasy omyrtqa ózeginiń qısaıýyna ákeledi. Deformasıanyń bul túri tek estetıkalyq jaǵynan ǵana emes, sonymen qatar medısınalyq kórsetkishter boıynsha da túzetilýi kerek»,- dep bastady baıandamasyn spıker.
Mamannyń aıtýynsha, keýde qýysynyń deformasıalaný sebebi týa bitkennen, sonymen birge, júre paıda bolýy múmkin. Klınıkalyq tájirıbede keýde qýysynyń kóbinese shuńǵyma tárizdi deformasıasy jáne shoqy tárizdi deformasıa túrleri kezdesedi.
«Keýde qýysynyń shuńǵyma tárizdi deformasıasy eń kóp taralǵan jáne ol 400 jańa týǵan náresteniń ishinde bireýinde kezdesedi. Shoqy tárizdi keýde deformasıasy deformasıanyń ekinshi jıi kezdesetin túri, ol shuńǵyma tárizdi túrine qaraǵanda qaraǵanda 5 ese az kezdesedi. Shoqy tárizdi keýde deformasıasy kezinde keýde qýysynyń aldyńǵy-artqy ólshemi ulǵaıady jáne ár túrli deńgeıge jáne pozısıaǵa ıe bolýy múmkin jota túrinde qalyptasady, sonymen qatar keýde qýysynyń búıirlik ólshemi tarylady», - dedi Nurlan Jarylqapov.
Bul deformasıanyń damýyn túsindiretin birneshe teorıalar bar. Keıbir avtorlar shuńǵyma tárizdi deformasıanyń damýy tós súıekti artqa qaraı ıteretin qabyrǵa shemirsheginiń shamadan tys ósýine baılanysty bolýy múmkin dep esepteıdi. Dıafragmatıkalyq aýytqýlar, rahıt nemese jatyrishilik qysymnyń joǵarylaýy da tós súıeginiń artqy yǵysýyna yqpal etedi dep sanalady.
Kóbinese shuńǵyma tárizdi deformasıa tirek-qımyl apparatynyń basqa aýrýlarymen, mysaly, Marfan sındromymen baılanysy, deformasıanyń belgili bir dárejesi dáneker tininiń aýytqýlaryna baılanysty ekenin kórsetedi. Genetıkalyq determınızm sonymen qatar shoqy tárizdi deformasıasy bar naýqastardyń 40% -ynda kezdesedi.
Keýde qýysy deformasıasynyń belgileri:
· tós jáne qabyrǵalardyń syrt kózge baıqalyp turatyn patologıalyq ózgeristeri;
· júrek-qan tamyrlary buzylystary;
· tynys alýdyń qıyndaýy;
· salmaqtyń azaıýy;
· arterıaldy qan qysymynyń kóterilýi;
· shamadan tys tersheńdik.
Sondaı-aq, brıfıń barysynda maman ota qalaı jasalatynyn, operasıadan keıingi qalpyna keltirý qansha ýaqytqa sozylatynyn jáne mundaı hırýrgıalyq aralasýlardyń kimderge qarsy kórsetilimderi bar ekenin aıtty. Dárigerler erte jasta ota jasaýǵa keńes beredi. Balalarda qalpyna kelý tezirek jáne ońaıyraq júredi.
«Eshqandaı qarsy kórsetilimder joq. Eger siz shara qoldanbasańyz, bul keýdeniń basyp turýy saldarynan ishki organdardyń jumysynyń buzylýyna ákelýi múmkin. Nassa operasıasy - bul shuńǵyma tárizdi keýde deformasıasyn joıýǵa arnalǵan, az ınvazıvti ádisti qoldanatyn hırýrgıalyq aralasý. Deformasıany túzetý tehnologıasy úsh kezeńdi qamtıdy: plasınany salý, ony taǵyp júrý kezeńi jáne plasınany alý», - dedi spıker.
18 jasqa deıingi balalar memleket esebinen saqtandyrylǵan jáne tegin medısınalyq kómek ala alady.