Almatyda táýlik boıy tolassyz jańbyr jaýdy. Qalanyń jol qyzmetteri kúsheıtilgen rejımde jumys istep jatyr, - dep habarlaıdy Aqshamnews.kz tilshisi.
Almatyda 16 qyrkúıekte saǵat 16:00-den bastap nóser jaýdy.
"Qazgıdromet" RMK dereginshe, qalada birneshe saǵat ishinde 12 mm, al taý bókterindegi jerlerde 15 mm jańbyr jaýdy. Bul jańbyrdyń bir aılyq mólsheriniń 53%-y (qyrkúıek aıyndaǵy norma-28 mm).
Jańbyr saldarynan bolǵan zardaptardy joıý úshin 96 birlik arnaıy tehnıka, 40 motopomp, 19 assenızator mashınasy (onyń 9-y aldyn ala sý basýy múmkin jerlerge jetkizildi), 416 jol jumysshysy, 2400 qap qum, motopompalarmen jáne qajetti qurylǵylarmen jabdyqtalǵan 71 jedel mobıldi brıgada jedel iske kirisken edi.
Jaýyn saldarynan bolǵan zardaptardy joıýǵa TJD, RJQO, Almaty qutqarý qyzmetiniń kúshteri, sondaı-aq merdiger uıymdar tartyldy. Merdigerlerdi qospaǵanda barlyǵy 23 qyzmetker, 7 birlik tehnıka, tirkeme jáne tasymaldanatyn motopompalar jumyldyryldy.
Nóser jaýynnyń jáne aryq jelisiniń jańbyr sýyna tolyp ketýi saldarynan qalanyń joǵarǵy bóliginde avtomobıl joldarynyń keıbir ýchaskeleri sý astynda qaldy.
Eń úlken júkteme Amanjol kóshesinde boldy, munda jol tóseminiń opyrylýy saldarynan 13 avtokóliktiń zaqymdanýy tirkeldi. Áýezov aýdany ákimi apparatynyń dereginshe, buǵan deıin bul ýchaskede "Spesstroı Grýpp LTD" JSHS merdigerlik uıymy sýmen jabdyqtaý jáne káriz jelilerin salý jumystaryn júrgizgen. "QazaqGaz" aq gaz qubyrynyń josparlanǵan qurylysyna baılanysty asfáltbeton jabyny tolyq qalpyna keltirilmegen.
Aýdannyń jańbyr sýy aryq naýalary arqyly dál osy kóshege aǵyp ketedi, bul júktemeni edáýir arttyrady. Sonymen qatar, ınjenerlik jelilerdiń tereń tósemi topyraqtyń negizin álsiretti. Qatty jańbyrmen birge bul jabynnyń shógýine jáne buzylýyna ákeldi.
Qazir Amanjol kóshesi jabyldy. Erteń zaqymdalǵan kólikterdi evakýasıalaý, topyraqty shyǵarý jáne ornyn toltyrý bastalady. Merdiger uıym zardap shekken kólikterdiń ıelerine keltirilgen zıandy óteýge mindettendi. Jaǵdaı ákimdiktiń baqylaýynda.
Taǵy bir problemalyq ýchaske - Manas pen Jandosov kósheleriniń qıylysy. aryq jelisi sý astynda qaldy. Negizgi sebep-asfalttalǵan jabyn, bul sýdyń aǵyp ketýin qıyndatýda. Zardaptardy joıý úshin "Almaty tazalyq"MKK brıgadalary sol jerge attandy. Aryqty tazartý, sý aǵyzý jumystary júrgizildi, qapshyqtar men qorshaýlar qoıyldy. Aryq júıesiniń odan ári turaqty jumysyn qamtamasyz etý úshin asfált jabynyn ashý josparlanyp jatyr.
Barlyq sý tasqyny joıyldy, kólik qozǵalysy qalpyna keltirildi. Túnde qaýipsizdikti qamtamasyz etý úshin 189 birlik tehnıka men 180 jumysshy kezekshilik etedi.
"Qazgıdromettiń" aýa raıy boljamy:
- 17 qyrkúıek – bultty, jaýyn-shashynsyz, kúndiz + 18...+20 °C.
- 18 qyrkúıek - keı jerlerde jańbyr jaýyp,naızaǵaı oınaıdy, túnde jáne tańerteń tuman, kúndiz + 16...+18 °C deıin.
- 19 qyrkúıek- aýa raıy boljamy osyǵan uqsas, keı jerlerde jańbyr men naızaǵaı, kúndiz temperatýra +16...+18 °C.