Almatyda 2024 jyldyń 9 tamyzynda jalpy qalalyq bos oryndar jármeńkesi ótedi. Mansap ortalyǵynyń basshysy Ádilet Jańabaev Óńirlik komýnıkasıalar qyzmetiniń alańynda ótken brıfıńte nıet bildirýshilerdi is-sharaǵa qatysýǵa shaqyrdy, dep habarlaıdy aqshamnews.kz
Ádilet Jańabaev bos oryndar jármeńkesine bilim, medısına, qarjy, óndiris, logıstıka jáne basqa da salalardaǵy bos jumys oryndary bar elýden astam jumys berýshi qatysatynyn habarlady.
Uıymdastyrýshylar jármeńkege myńnan astam adam qatysady dep boljap otyr.
«Jármeńkelerdi ótkizýdiń maqsaty - jastarǵa, oqý oryndarynyń túlekterine, jumys izdeýshilerge, azamattardyń jekelegen sanattaryna jumys oryndarynyń qoljetimdiligin keńeıtý, sondaı - aq jumys berýshilerge laıyqty úmitkerlerdi tartý arqyly jumysqa alý prosesin jeńildetý jáne olardyń jumysqa ornalasýyna járdemdesý bolyp otyr», - dep tolyqtyrdy ol. JOO túlekteri men jumyssyz júrgen jastarǵa, biliktiligi men tájirıbesi joq jastarǵa erekshe kóńil bólinedi. ÓKQ spıkeri jumyssyz júrgen 4000 jas SMS aqparat alǵanyn atap ótti.
«Jármeńkege memlekettik baǵdarlamalar boıynsha jumysqa ornalasqysy keletin azamattarǵa qyzmet kórsetetin bizdiń qyzmetkerler de qatysady. Mysaly, jastar úshin bul «Jastar praktıkasy», «Alǵashqy jumys orny» baǵdarlamalary nemese tegin oqý kýrstary bolýy múmkin», - dedi Ádilet Jańabaev.
Spıker sondaı-aq, jumysqa turar aldynda qalaı áńgimelesý kerektigi jónindegi keńesterin berdi jáne jaqsy túıindeme daıyndaýdyń mańyzdy ekenin aıtty.
«Suraqtarǵa daıyn bolý, mamandyqtyń ózektiligi men qajettiligi, sondaı-aq aldyńǵy jumys ornynan usynym hattyń bolýy jumysqa ornalasýǵa kómektesedi. Osyǵan baılanysty jármeńke baǵdarlamasynda Almaty qalasynyń eńbek mobıldiligi, ortalyǵynyń kásibı baǵdar berýshilerinen trenıńter men sheberlik synyptary qarastyrylǵan», - dedi ol.
Jármeńkelerdi ótkizý kompanıa ókilderine óz kásiporyndarynyń múmkindikterin tanystyrýǵa múmkindik beredi, al jumys izdeýshiler qysqa merzimde kadrlardy irikteýge múddeli jumys berýshilermen sóılese alady, ózderin qyzyqtyratyn bos jumys oryndaryn tańdap, tańdalǵan bos jumys oryndaryna aldyn ala áńgimelesýden óte alady.
«Jumys tapqysy keletinderdiń bárin turaqty jumysqa ornalasýǵa tamasha múmkindik beretin jármeńkege shaqyramyz», - dedi Á.Jańabaev.
Jármeńkeniń ótetin orny: Jibek joly dańǵyly, Panfılov kóshesiniń qıylysy (Arbat) saǵat 10:00-de.
Tolyǵyraq aqparatty Dostyq dańǵyly, 85 mekenjaıynda ornalasqan Almaty qalasynyń Mansap ortalyǵynan alýǵa bolady. Bolmasa, +7 727 310-47-82 telefon nómiri arqyly.