Kardıologıa jáne ishki aýrýlar ǵylymı-zertteý ınstıtýtynyń bazasynda jańa endoskopıalyq oqý ortalyǵy ashyldy.
Bul ortalyqta tek Qazaqstannan ǵana emes, Ortalyq Azıa elderinen kelgen endoskopıst-dárigerler de biliktilikterin arttyra alady.
Ortalyq Evis X1 endoskopıalyq júıeleri men joǵary tehnologıaly sımýlátorlar sıaqty eń zamanaýı qural-jabdyqtarmen jabdyqtalǵan. Bul oqý prosesin halyqaralyq standarttarǵa saı deńgeıde uıymdastyrýǵa múmkindik beredi.
«Ortalyqtyń ashylýyna álemdik medısınalyq jabdyqtar óndirisiniń kóshbasshysy – Olympus kompanıasymen strategıalyq áriptestigimiz yqpal etti. Seriktesterimizge kórsetken qoldaýy úshin shynaıy alǵysymdy bildiremin. Jańa ortalyq bizdiń dárigerlermen qatar Ózbekstan, Tájikstan, Túrikmenstan jáne Qyrǵyzstannan kelgen áriptesterimiz óz daǵdylaryn shyńdap, tájirıbe almasyp, aldyńǵy qatarly tehnologıalardy meńgeretin mańyzdy alańǵa aınalatynyna senemin. Bul mamandardyń biliktiligin arttyrýmen qatar, dıagnostıka men medısınalyq kómektiń sapasyn arttyrýǵa múmkindik beredi», – dep atap ótti Instıtýttyń Basqarma tóraǵasy Rústem Tóleýtaev.
«Trenıń ortalyǵyn qurýǵa Qazaqstan, Japonıa, Polsha jáne Chehıa komandalarynyń atsalysqanyna qýanyshtymyz. Ortalyq mamandardy daıarlaý, bilim almasý jáne joǵary standarttardy engizý salalarynda jańa múmkindikter ashady», – dedi Olympus Corporation ókili Iohı Maeda (Japonıa).
Oqý ortalyǵynyń baǵdarlamalaryna teorıalyq kýrstarmen qatar, sımýlátorlarda jáne naqty klınıkalyq jaǵdaıda ótkiziletin keń kólemdi praktıkalyq sabaqtar da kiredi. Bul oqý prosesiniń tıimdiligin barynsha arttyrýǵa múmkindik beredi.
«Oqý ortalyǵy – bul endoskopıalyq dıagnostıkany jańa deńgeıge kóteretin zamanaýı bilim berý haby. Biz óz dárigerlerimizdi sapaly kolonoskopıa ádisterine úıretip qana qoımaı, ADR kórsetkishin esepteý júıesin engizetin bolamyz. Bul kórsetkish – tik ishek pen toq ishek qaterli isigimen kúrestegi sheshýshi faktor. Ony qoldaný myńdaǵan adamnyń ómirin saqtap qalýǵa múmkindik beredi», – dedi Basqarma tóraǵasynyń ǵylymı-klınıkalyq jáne ınovasıalyq qyzmet jónindegi orynbasary Jamılá Qaıbýllaeva.
Bul mańyzdy oqıǵa Qazaqstandaǵy medısınalyq bilim berý men tehnologıalardy damytýdyń jańa kezeńiniń bastalǵanyn bildiredi.