Almatyda aýany jaqsartý jáne kólik ınfraqurylymyn damytý baǵytynda keshendi sharalar qolǵa alyndy. Bul týraly qala ákiminiń orynbasary Almasqan Smatlaev Óńirlik komýnıkasıalar qyzmetinde ótken baspasóz konferensıasynda málimdedi.
Alǵash ret almatylyq aglomerasıada lastaýshy zattardyń ruqsat etilgen deńgeıine zertteý júrgizildi. Oǵan qala aýmaǵymen birge 10 shaqyrymdyq radıýstaǵy kólik, jeke úıler men monshalar da engizildi. Nátıjesinde jylyna 225 myń tonnadan astam shyǵaryndylar tirkeldi, onyń 189 myńy Almatyǵa tıesili. Lastanýdyń 60%-ǵa jýyǵy kólikten keledi.
«Qalada kún saıyn 1,1 mln-nan astam kólik júredi. 2030 jylǵa qaraı Almaty halqy 2,5 mln adamǵa jetip, ár myń turǵynǵa 311 kólikten kelmek. Bul jaǵdaı qoǵamdyq kólikti – metro, LRT, BRT, aspaly joldar jáne ózge baǵyttardy jedel damytý qajettigin kórsetedi», – dedi Almasqan Smatlaev.
2025 jyldan bastap avtokólik shyǵaryndylaryna qatysty zańnama kúsheıtildi: endi shekten tys lastaýǵa eskertý jasalmaıdy, birden aıyppul salynady. Qaıtalanǵan jaǵdaıda jeke tulǵalarǵa – 10 AEK, zańdy tulǵalarǵa – 100 AEK, al óreskel buzýshylyq úshin tıisinshe 20 jáne 200 AEK aıyppul qarastyrylǵan.
Qazir atmosferalyq aýany qorǵaý erejeleriniń jobasy daıyndalyp jatyr. Qujat tıisti organdarmen kelisilgen soń jyl sońyna deıin máslıhattyń qaraýyna usynylady. Ol qaladaǵy ekologıalyq qaýipsizdikti arttyrýǵa, turǵyndarǵa taza ári qolaıly orta qalyptastyrýǵa jáne aýanyń lastanýyn azaıtýǵa baǵyttalǵan.