Almatyda jylytý jáne ystyq sýmen jabdyqtaý úshin komýnaldyq kásiporyn aldyndaǵy qaryzdaryn aıyppulsyz ótegisi keletin jylý energıasyn tutynýshylar úshin «Qaryzdaryńdy, ósimpuldy esepten shyǵaramyz» aksıasy iske qosyldy.
Aksıa jylýdy paıdalanǵany (ystyq sý, jylý) úshin ýaqtyly tólemegen jeke tulǵalarǵa (turmystyq tutynýshylarǵa) qoldanylady, dep habarlaıdy aqshamnews.kz.
Aksıaǵa qatysý úshin osy jyldyń qazan aıynan jeltoqsannyń sońyna deıin qaryzdy tolyq tólep, «Almaty jylý jelileri» JSHS-ne jazbasha ótinishpen júginý qajet. Ótinishke páterge quqyq belgileıtin qujattardyń, jeke kýálik jáne tólem túbirteginiń (kasalyq chek) kóshirmesin tirkeý qajet.
Ósimpuldy esepten shyǵarý ystyq sý men jylytý úshin bereshekti tolyq ótegen jaǵdaıda ǵana múmkin bolady.
Kórsetilgen qujattarmen myna mekenjaıda ornalasqan tutynýshylarǵa qyzmet kórsetý ortalyqtarynyń birine (KQKO) júginý qajet:
- «Batys» QKO (Alataý, Áýezov jáne Naýryzbaı aýdandaryna qyzmet kórsetedi) – «Aqsaı-4» sh/a, 51-B, telefondary: 341-05-30, 341-05-31, e-mail: batys@alts.kz;
- «Ortalyq» QKO (Almaly jáne Bostandyq aýdandaryna qyzmet kórsetedi) - Shapyq Shókın kóshesi, 221-V, telefondary: 341-05-28, 341-05-29, e-mail: ortalyc@alts.kz;
– «Shyǵys» QKO (Jetisý, Medeý jáne Túrksib aýdandaryna qyzmet kórsetedi)-Tólebaev kóshesi, telefondary: 341-05-32, 341-05-33, e-mail: shygis@alts.kz.
QKO-na barý múmkindigi bolmaǵan jaǵdaıda qujattardy elektrondyq poshtaǵa info@alts.kz. jiberýge bolady.
Sondaı-aq, 341-07-77 nómirine qońyraý shalý arqyly AJJ anyqtamalyq qyzmetine habarlasý arqyly bereshek týraly aqparat nemese jylý energıasyn esepteý boıynsha keńes alýǵa bolady. Sonymen qatar, WhatsApp nómiri qoldanylady: +7 (701) 027-11-20 (tek habarlamalardy qabyldaý úshin jumys isteıdi).
Esterińizge sala keteıik, bereshek tólenbegen jaǵdaıda, qaryzy barlar jylýmen jabdyqtaý qyzmetterinen ajyratylady, al qaryzdar somasy sot arqyly múlikke jáne banktik shottarǵa tyıym salýmen óndiriledi.