«Dınamo» stadıonynda «Nashaqorlyqqa jol joq» uranymen ótken esirtki jarnamalaryn joıý aksıasyna myńǵa jýyq adam qatysty. İshki ister organdarynyń qyzmetkerlerimen qatar prokýratýra, áskerı polısıa qyzmetkerleri, S.J. Asfendıarov atyndaǵy QazUMÝ stýdentteri, Eriktiler lıgasynyń músheleri jáne qala turǵyndary da aksıaǵa atsalysty.
– Aýqymdy aksıa Prezıdenttiń tapsyrmalaryn oryndaý jáne 2023–2025 jyldarǵa arnalǵan nashaqorlyq pen esirtki bıznesine qarsy kúres jónindegi keshendi jospardy iske asyrý aıasynda ótkizilýde. Jyl basynan beri Almatyda polısıa qyzmetkerleriniń kúshimen esirtki, psıhotroptyq zattar jáne olardyń analogtaryn nasıhattaıtyn bes myńnan astam habarlamalar (esirtki graffıtı) boıalyp joıyldy, – dedi Almaty qalasy Polısıa departamentiniń esirtki qylmysyna qarsy kúres basqarmasynyń asa mańyzdy ister jónindegi aǵa jedel ýákili, polısıa podpolkovnıgi Dáýren Kóbeev.
Onyń aıtýynsha, esirtki jarnamasyna telegram-siltemeler, QR-kodtar, sondaı-aq aptasyna 500 myńnan 1,5 mıllıon teńgege deıingi joǵary jalaqy ýáde etetin kúdikti habarlandyrýlar jatady.
Qazaqstan Respýblıkasynyń Qylmystyq kodeksiniń 299-babyna sáıkes, esirtki quraldaryn nasıhattaý/jarnamalaý alty jylǵa deıin bas bostandyǵynan aıyrý jazasyna kesiledi.
Almatylyq stýdent Rınat Rahymjanov osyndaı aksıalarǵa birneshe ret qatysqan.
– Esirtkige qarsy kúreske óz úlesimdi qosqanyma qýanyshtymyn. Ózim salaýatty ómir saltyn qoldaımyn jáne barlyq adamdardy soǵan shaqyramyn, – dep atap ótti belsendi.