Almatyda 2025 jyldyń basynan beri jastarǵa teń múmkindik jasap, damýy men ózin-ózi júzege asyrýyna júıeli túrde jaǵdaı jasalyp keledi. 2025 jyldyń qańtar aıynan bastap NEET sanatyndaǵy jastardyń úlesi 6,4%-dan 5,8%-ǵa deıin azaısa, jastar arasyndaǵy jumyssyzdyq deńgeıi 2024 jyldyń qorytyndysyndaǵy 4,4%-dan 2025 jyldyń III toqsanynda 4,1%-ǵa tómendegen. Bul týraly qalalyq Jastar saıasaty basqarmasynyń ókilderi aıtty.
Jumysqa ornalastyrýǵa arnalǵan «Jobfair365» jáne oqytýǵa baǵyttalǵan «SkillBridge» servısterimen jabdyqtalǵan «Jasalmaty.kz» aqparattyq portalyna 25 myńnan astam biregeı qoldanýshy kirgen. Qazaqstannyń 20 óńirinen 3 myńnan astam jumys berýshi tirkelip, 5 myńnan astam bos jumys orny jarıalanǵan. Jyl basynan beri bul servıster arqyly 1,8 myń jas maman jumysqa ornalasqan.
Qalada Jastar mansap ortalyǵy jumys isteıdi. Ol jumys berýshilerdi, Eńbek mobıldiligi ortalyǵyn jáne oqý oryndaryn bir alańǵa biriktirip, olardyń ózara áreketin jedel úılestirýge múmkindik beredi. Ortalyq ashylǵaly beri 5 myńnan astam jas maman júgingen, olardyń 4 myńy jumysqa ornalasýǵa kómek alǵan.
Almatynyń iri jumys berýshileri men joǵary oqý oryndary birigip 8 Mansap kúni ótkizilip, 1,9 myń jas jumysqa turǵan. «Jasyl el» ulttyq jobasy aıasynda jaz kezinde 2,1 myń jas ýaqytsha jumyspen qamtyldy. 2025 jyldyń qańtarynan beri Eńbek mobıldiligi ortalyǵy arqyly 9,7 myń jas jumysqa ornalasqan. Jalpy jyl basynan beri 19,5 myńnan astam jas maman eńbekke tartyldy.
«Biz jastarǵa bilim men daǵdy ǵana emes, naqty jumysqa ornalasý jáne mansaptyq ósýdiń jolyn usynatyn júıe quryp jatyrmyz. Oqytý men jumysqa ornalasý qatar júretin úderis. Bul jastar áleýetin naqty múmkindikterge aınaldyrady», — dedi Almaty qalasy Jastar saıasaty basqarmasynyń basshysy Azız Kajdenbek.