Almaty qalalyq prokýratýrasy men qalalyq polısıa departamenti birlese ótkizgen reıdtiń barysynda júrgizýshi kýáliginsiz avtokólik júrgizgen azamat anyqtaldy, dep habarlaıdy Almaty-akshamy.kz.
Qalalyq prokýratýranyń baspasóz qyzmetinen habarlaǵandaı, 3 jeltoqsan kúni polısıa ekıpajy B. esimdi azamat júrgizgen «Mersedes» markaly avtokólikti toqtatady. Tekseris barysynda onyń bıyl 10 qarashada júrgizýshi kýáliginen 6 aıǵa aıyrylǵany anyqtaldy.
«Sol kúni ol Almaty qalasynyń Ákimshilik quqyqbuzýshylyqtar jónindegi mamandandyrylǵan aýdanaralyq sotynyń QR ÁQBtK-niń 612-babynyń 3-bóligi boıynsha shyǵarǵan sheshimimen 10 táýlikke ákimshilik qamaýǵa alyndy», - dep habarlady prokýratýradan.
Osyǵan oraı Almaty qalalyq prokýratýrasy avtokólik júrgizýshilerdi jol qozǵalysy erejelerin saqtap, basqa kólik júrgizýshilerge qaýip tóndirmeýge shaqyrdy.