Almatydaǵy kardıologıa jáne ishki aýrýlar ǵylymı-zertteý ınstıtýtynda alǵash ret 58 jastaǵy pasıentke endovaskýlárlyq mıtraldi qaqpaqsha ımplantasıalandy, dep habarlaıdy Almaty-akshamy.kz.
Dárigerler 58 jastaǵy pasıentte júre paıda bolǵan júrek aqaýy, mıtraldi qaqpaqshanyń jetkiliksizdigi, júrektiń ıshemıalyq aýrýy dıagnozyn qoıǵan.
Belgili bolǵanyndaı, naýqas 3 jyl buryn mıokard ınfarktisine shaldyqqan. Oǵan mıtraldi qaqpaqshanyń plasıkasy, mamarokoronarlyq jáne aortokoronarlyq aýtovenozdy shýnttaý jasalǵan.
Eshqandaı áser bolmaǵandyqtan, oǵan mıtraldi qaqpaqshany transkateterlik ımplantasıalaý (TMVI) usynyldy.
Mıtraldi qaqpaqshany protezdeý mıtraldi stenozdy emdeýdiń negizgi ádisi. Sondaı-aq, ımplantasıalaý mıtraldi qaqpaqshanyń jetkiliksizdigi - qaqpaqshanyń qandy keri ótkizgen jaǵdaıda jasalady.
«Bizdiń klınıkada sońǵy 3 jylda qolqa qaqpaqshasyn endovaskýlárly ımplantasıalaý (TAVI) boıynsha joǵary tehnologıalyq operasıalar sátti jasalyp júr, al tehnıkalyq jaǵynan ozyq jáne kúrdeli operasıalardyń biri sanalatyn mıtraldi qaqpaqshany transkateterlik ımplantasıalaýdy (TMVI) biz alǵash ret jasadyq», - deıdi Kardıologıa jáne ishki aýrýlar ǴZI Basqarma tóraǵasy Marat Pashımov.
Rentgenoperbloktyń meńgerýshisi Alekseı Kolesnıkovtyń aıtýynsha, mıtraldi qaqpaqshanyń endovaskýlárlyq protezdeýi - mıtraldi stenozben aýyratyn naýqastardy hırýrgıalyq emdeýdiń ońtaıly túri, sebebi mundaı dıagnozy bar naýqastarǵa dástúrli hırýrgıalyq operasıalar jasaǵanda ólim qaýpi joǵary bolady.
Bul operasıa mıtraldi aqaýy bar qan tamyrlarynyń zaqymdanýy, ókpeniń, baýyrdyń sozylmaly aýrýlary, endokrındik patologıa, onkologıa sıaqty kúrdeli aýrýlarǵa shaldyqqan naýqastarǵa kórsetilgen.
«Mıtraldi qaqpaqshany aýystyrý úlken hırýrgıalyq kesýlersiz, jasandy qan aınalymy men jalpy narkozsyz, rentgendik baqylaýmen sannyń kóktamyryn tesý arqyly júzege asyrylady. Bul tehnologıanyń artyqshylyqtarynyń biri - tós súıegin tilý áserlerin, ıaǵnı, qan joǵaltý, pasıenttiń aýyrsyný sındromynyń qarqyndylyǵyn, operasıadan keıingi tigispen baılanysty ınfeksıa qaýpin azaıtady. Endovaskýlárlyq tehnologıany qoldaný pasıentterdiń ońaltý kezeńin de edáýir qysqartady»,- deıdi ol.
Dáriger qazir naýqastyń jaǵdaıy jaqsy ekenin atap ótti.